Къабарты-Малкъарны Жамауат палатасында республикада ртутьлары болгъан кир-кипчикни жыйыуну эм чыгъарыуну сорууун тинтгендиле.
 
Агропромышленный комплекс, табийгъат байлыкъланы хайырланыу, къудуретни сакълау эм экология жаны бла комиссияны башчысы Юрий Колесников билдиргеннге кёре, регионну битеу муниципалитетлери адамланы саулукъларына эм жашауларына къоркъуу, жаныуарлагъа, битимлеге заран салыргъа боллукъ ток чыракъланы, жарыкъ берген башха устройстволаны жыйыу, чыгъарыу, аланы зарансыз этиу жаны бла бегимлени къабыл кёргендиле.                                                               
 
Жамауат палатаны 2022 жылда 22 мартда болгъан жыйылыуунда этилген эсгертиулени эм Россейни Правительствосуну производство кир-кипчикни кетериуню юсюнден 2314-чю бегимин толтурууну чегинде Басхан районну администрациясы «Росатом» къырал корпорация бла келишим болмагъан кезиуде «Антиртутный центр» общество бла байламлыкъда ишлегенди. Ара ЛД эм ЛБ люминесцент, энергияны аягъан эм бактерицид лампаланы жокъ этиу жаны бла ишни тамамлагъанды. Районну эллери барысы да аны бла бу ишни тамамлайдыла. Къабарты-Малкъарны Табийгъат байлыкъла эм экология министерствосундан билдиргенлерича, заранлыкъларына кёре биринчи эм экинчи къауумлагъа кирген кир-кипчикни къурутуу бла къыралны Правительствосуну оноуу бла «Росатом» кюрешеди, битеу бюджет организацияла анда эсеплеуню этгендиле. 
 
Прохладный шахарда промышленный предприятияла ртутьлары болгъан багушну региондан чыгъарыу эм къурутуу жаны бла келишимле тауусхандыла. Ала ишлеген «Экоград» общество заранлыгъы бла биринчи-тёртюнчю къауумлагъа кирген багуш бла, ол санда ртутьлары болгъанла бла да ишлерге эркинлиги барды. Прохладна районда светодиод эм LED лампала хайырланыладыла, билим бериу, маданият, спорт, саулукъ сакълау учрежденияла ртутьлары болгъан жарыкъ берген приборла энчи, тыш адам киралмазча жерледе жыйышдырыладыла, артда уа аланы «Экоград» неда башха, бу жумушланы тамамларгъа эркинлик алгъан, организация чыгъарады. Сагъынылгъан учреждениялада бу ишге жууаплылыкъ директорланы мюлк жаны бла орунбасарларына салынады.
 
Терк районну уа «Федерал экология оператор» бла келишими барды, ртуть термометрлени, батарейкаланы, люминесцентный лампаланы эм аллай башха кир-кипчикни ол чыгъарады. Жамауатны экология жаны бла билимин ёсдюрюр мурат бла «Терек-1» район газетни эм администрацияны официал сайтыны болушлугъу бла информация-ангылатыу иш бардырылады, анда кир-кипчикни энчи къауумлары, аланы башха-башха жыйыуну юсюнден айтылады.    
 
Май районда быллай багушну «Сервис+» бла «Фаворит» обществола толтурадыла. Жарыкъландырыу ишни Нальчикни администрациясы да тамамлайды, асламлы информация органланы болушлукълары бла коммунал багушну бирге жыяргъа жарамагъаныны, ртутьлары болгъан кир-кипчикни, батарейкаланы айырып жыйыуну системасын кийириуню юсюнден билдириледи. 
 
Бу жаны бла жарсыуну тамамлауну Жамауат палата эсепде тутарыкъды, деп билдиредиле аны пресс-службасындан.
Кульчаланы Зульфия.