«Гранд-Кавказ» хьэ­щIэ­щым къыщызэIуахащ республикэм и сурэтыщI цIэ­рыIуэ Щэмей Руслан и лэжьыгъэ гъэщIэгъуэнхэр щызэхуэхьэса «О прошлом» гъэлъэгъуэныгъэр. Ар къы­зэрагъэпэщащ художникыр илъэс 60 зэрырикъум и щIыхькIэ. 

КъатитIми я пэIущIэ пэш­хэм щагъэлъагъуэ сурэты­щIым и лэжьыгъэ 20-м ­щIигъу. Щэмейм зэрыжиIэмкIэ, сурэт ищIынымкIэ абы гукъыдэж къезытыр цIыху гъащIэрщ. 
ХьэщIэщым гъуазджэ лэ­жьыгъэхэр щыгъэлъэгъуэ­ным теухуа хабзэ дахэр Щэ­мей Руслан и Iэдакъэ­щIэкIхэмкIэ яублауэ щытащ. Ноби а Iуэхум зэрыпащэр ­гуапэщ. Руслан и лэжьыгъэхэр щIэщыгъуэщ, гупсысэ куу зыщIэлъщ, плъыфэбэщ. «Анэ», «Бжьыхьэ», «ГукъэкIыжхэр», «Мэзым и Тхьэ», «Сэхуран», «Пшэ», «Дыгъэ», «Кхъужь» зыфIища и сурэтхэр дэтхэнэри гум дохьэ, гукъэкIыжхэм ухашэ. 
Щэмей Руслан Ленинград къыщиухащ Репиным и цIэр зезыхьэ Художественнэ училищэр. Къэрал, дунейпсо гъэлъэгъуэныгъэхэм художникым жыджэру зэрызыкъыщигъэлъагъуэр и щыхьэтщ зы пIэм имыту абы и зэ­фIэкIым зэрыхигъахъуэмрэ зэрызиужьымрэ. Ди хэкуэгъу щIалэм и ехъулIэныгъэхэм дэри дрогушхуэ.
Выставкэм зыкърагъэ­хьэлIащ икIи псалъэ гуапэхэр сурэтыщIым хужаIащ и лэ­жьэгъухэмрэ, ныбжьэгъу­хэмрэ. 

Бжьыхьэ Розэ.