Къэбэрдей-Балъкъэр къэ­рал мэкъумэш университетыр мы гъэм диплом плъыжькIэ къэзыухахэм вэсэмахуэ еджапIэ нэ­хъыщ­хьэм ахэр щратыжащ. Абы теухуа зэIущIэм хэтащ КъБР-м и Iэтащхьэм и ­къалэнхэр пIалъэкIэ зыгъэзащIэ КIуэкIуэ Казбек, КъБР-м и Правительст­вэмрэ щIыпIэ самоуправ­ленэмкIэ и органхэмрэ я лIы­кIуэхэр.
Зэхыхьэр щIимыдзэ щIы­кIэ, КIуэкIуэ Казбек зыщиплъыхьащ еджапIэм и Агрономие факультетым, ар щагъэгъуэзащ студентхэр зэрырагъаджэ Iэмалхэм, пщIэншэу зэрагъашхэм. ­КъБР-м и Iэтащхьэм и къалэнхэр пIалъэкIэ зыгъэзащIэр епсэлъащ еджапIэм щIэтIысхьэн папщIэ а махуэм экзамен зытыну къэ­кIуахэми. КIуэкIуэр къыщы­зэтеувыIащ КъБКъМУ-м и ректору щыта Жырыкъуэ Борис и фэеплъым и деж, иужькIэ яхыхьащ еджапIэр къэзыуххэм.
Мы гъэм Къэбэрдей-­Балъкъэр къэрал мэкъу­мэш университетыр цIыху миным нэблагъэм къаухащ, абыхэм ящыщу диплом плъыжьыр къахьащ 173-м.
- Нобэ ди гуапэу дынывохъуэхъу еджапIэм и егъэ­джэныгъэ, щIэныгъэ, жылагъуэ Iуэхухэм жыджэру хэта, къыщIэдгъэкI ди студент ­нэхъыфIхэм. Сэ къызэрыслъытэмкIэ, абыхэм я ехъулIэныгъэхэр зи фIыщIэр университетым и егъэджа­кIуэхэм я закъуэкъым, щIалэгъуалэм сыт щыгъуи зыкъыщIагъакъуэу я щIыбагъ къыдэт адэ-анэхэми абы я гуащIэ хэлъщ. Сыхуейт дэтхэнэми фIыщIэ хуэсщIыну, IэщIагъэлI нэс къахэкIыну дызыщыгугъ щIэблэ гъэса къызэрагъэтэджам папщIэ, - жиIащ КъБКъМУ-м и ректор Апажэ Аслъэн зэхыхьэр къыщызэIуихым.
Ректорым КIуэкIуэ Казбек фIыщIэ хуищIащ, къазэры­хуеблэгъар къыхигъэщу, икIи дыщIигъуащ КъБР-м и Iэтащхьэм и къалэнхэр пIалъэкIэ зыгъэзащIэми илъэс 25-рэ и пэкIэ абы щыгъуэм Къэбэрдей-Балъкъэр агромелиоративнэ институткIэ зэджэу щыта а еджапIэм хадэхэкIрэ жызумрэ гъэ­кIы­нымкIэ и къудамэр къиухауэ зэрыщытар. «Дыщогугъ но­бэ къыщIэдгъэкIхэми дызэ­ры­гушхуэн IэщIагъэлIхэр къа­хэкIыну, я щIэныгъэмкIэ республикэм хуэщхьэпэну», - пищащ Апажэм.
КIуэкIуэ Казбек щIалэ­гъуалэм щехъуэхъум жиIащ университетым егъэджа­кIуэфIхэр зэриIэр, ныбжьы­щIэхэм я студент гъащIэр гъэ­щIэгъуэну, купщIафIэу къы­зэрыщызэгъэпэщам арэ­зы укъызэрищIыр.
- Къэбэрдей-Балъкъэрым и къэкIуэнур елъытащ ди IэщIагъэлIхэм я зэфIэкIым. ЕджапIэ нэхъыщхьэм фы­щIэсыху зэвгъэгъуэта щIэ­ныгъэмрэ зыIэрывгъэхьа ехъулIэныгъэхэмрэ я щы­хьэтщ нобэ къыватыж дип­лом плъыжьхэр, - жиIащ КIуэкIуэм. - Си гуапэу сыны­вохъуэхъу фи мурадхэр къывэхъулIэну, лъагапIэ­щIэхэм фынэсыну. Ды­щогугъ КъБКъМУ-р къэ­зыуххэм республикэм и зыужьыныгъэм фи къару ефхьэлIэну, жылагъуэ гъащIэми жыджэру фыхэтыну. ЩIыналъэм и экономикэр езыгъэфIэкIуэну IэщIагъэлI­хэр тхуэзыгъэхьэзыр егъэджакIуэхэми фIыщIэ яхуэсщIыну сыхуейт.
ЩIалэгъуалэм ехъуэ­хъуащ УФ-м и Президентым и полномочнэ лIы­кIуэу ­КИФЩI-м щыIэм и Аппаратым Къэбэрдей-Балъ­къэ­рым къегъэщIылIа и фе­деральнэ инспектор нэ­хъыщхьэ Ткачёв Евгений, КъБР-м и Правительствэм и УнафэщIым и япэ къуэдзэ - КъБР-м мэкъумэш Iэна­тIэмкIэ и министр Говоров Сергей, ­КъБР-м цIыхухэр егъэ­джэнымкIэ, щIэныгъэмрэ щIалэгъуалэм я Iуэху­хэмкIэ и министр Къу­мыкъу Iэуес, КъБР-м Проф­союз IуэхущIапIэхэм я зэгу­хьэ­ны­гъэхэм я унафэщI Ам­щыкъуэ ФатIимэт сымэ.
Пшыхьыр ягъэдэхащ ­КъБР-м, АР-м, Осетие Ип­щэмрэ Ищхъэрэмрэ щIыхь зиIэ я артист Хъыжьро­къуэ СулътIан, КъБР-м и цIыхубэ артист Текуев Амур, КIыщхэ Ислъамрэ Каринэрэ, еджапIэ нэхъыщхьэм и къэфакIуэ гупхэм.