Прохладнэ районым хыхьэ Янтарнэ къуажэм дэт амбулаторэр зэраухуэрэ иджы япэу зэгъэпэщыжыныгъэ Iуэхухэр щрагъэкIуэкIыу аращ. КъБР-м узыншагъэр ­хъумэнымкIэ и министр Къалэбатэ Рустам медицинэ IуэхущIапIэм къыщрахьэжьа лэжьыгъэхэр зэрагъэзащIэм зыщигъэгъуэзащ.

Зы къату щыт амбулаторэ унэр 1962 гъэм яухуауэ щытащ, абы медицинэ дэIэпыкъуныгъэ щагъуэт къуажэм дэс цIыху 2300-м, абыхэм ящыщу 500-р сабийщ. 
Зэгъэпэщыжыныгъэхэм хыхьэу зэрахъуэкIащ IуэхущIапIэр зэрагъэплъ, абы псы зэрекIуалIэ бжьамийхэр, уэздыгъэ кIапсэхэр, бжэ-щхьэгъубжэ блыпкъхэр хагъэуващ. Мы зэманым ухуакIуэхэм пэш кIуэцIхэр зэрахьэн, унащхьэр зэхъуэкIын, унэ щIыбыр къэгъэщIэрэщIэжын щIадзащ. 
Илъэгъуахэм япкъ иткIэ, министрым IэщIагъэлIхэм пщэрылъ зыбжанэ ящищIащ. Апхуэдэу гулъытэ зыхуэ­щIыпхъэхэм ящыщу къыхигъэщащ Iуэхутхьэбзэ хуэны­къуэ цIыхухэм я тыншыпIэм тещIыхьауэ медицинэ пэшхэр зэхагъэщхьэхукIыну, сымаджэхэр зэтримыхьэу зэрызэ­благъэкIынури Iуэхум къыхалъытэну. 
Лэжьыгъэхэр ирагъэкIуэкI «Узыншагъэр хъумэн» лъэпкъ проектым «ЦIыхухэм япэ медицинэ дэIэпыкъуныгъэхэр щрат IуэхущIапIэхэр къэгъэщIэрэщIэжын» и щIыналъэ программэм ипкъ иткIэ. Зэгъэпэщыжыныгъэхэр зэфIагъэкIынущ мы илъэсым и кIэм ирихьэлIэу.

ЩхьэщэмыщI Изэ.