Къэбэрдей-Балъкъэрым и муслъы­мэн­хэм я IуэхущIапIэм хъыбар къы­зэрыдигъащIэмкIэ, щэкIуэгъуэм и 15-м Шэшэн Республикэм и щыхьэр Грозный къалэм щекIуэкIащ «ФIэщхъуныгъэм къыхуеджэныгъэ пхэнжхэм ущехъумэ» зыфIаща щIэныгъэ конференц. 

Зэхуэсыр ирихьэлIащ Кавказ Ищхъэрэм ис муслъымэнхэм я зэзыгъэуIу центрыр илъэс 25-рэ зэрырикъуам. ­КъБР-м икIа гупым я унафэщIу щыта муфтий Дзасэжь Хьэзрэталий-хьэжы зэхуэсым къыщыпсэлъащ: «Нобэ зи илъэс 25-р дгъэлъапIэ, Кавказ Ищхъэрэм ис муслъымэнхэм я зэзыгъэуIу центрым хузэфIэкIахэр къэтпщытэжу аращи, жыIапхъэщ ар фIэщхъуныгъэ зыбгъэдэлъу кавказ щIыналъэм щыпсэухэр зэкъуэзыгъэува зэгухьэныгъэ щхьэпэ зэрыхъуар. Дэ тщыгъупщакъым ар шэшэн лъэпкъым и къуэ пэж, жэнэткIэ Алыхьым игъэгуфIэн Кадыров Ахъмэт и фIыгъэкIэ зэрызэфIагъэувауэ щытари. Ди унафэщI, ди ­къуэш нэхъыжь Бердиев Исмэхьил-хьэжы и унафэм щIэт зэгухьэныгъэр илъэс 25-кIэ пхиша гъуэгум дяпэкIи зэрытемыкIынур хьэкъщи, Алыхьталэм солъэIу ар къэкIуэну зэманми IуэхуфIхэр длэжьынымкIэ щIэгъэкъуэн къытхуэхъуну».