Налшык и Къэрал концерт гъэлъэгъуапIэм щэкIуэгъуэм и 24-м щагъэпажащ КъБР-м Лъэпкъ Iуэхухэмрэ жылагъуэ проектхэмкIэ и министерствэм республикэм и хъыбарегъащIэ IэнатIэхэм я лэжьакIуэхэм папщIэ къызэригъэпэща «На исторической родине: Кабардино-Балкария - республика дружбы и согласия» зэпеуэм къыхэжаныкIа журналистхэр.
Пшыхьыр иригъэкIуэкIащ КъБР-м щIыхь зиIэ и артисткэ, ЩоджэнцIыкIу Алий и цIэр зезыхьэ Къэбэрдей къэрал драмэ театрым и актрисэ КIэхумахуэ ФатIимэ.
КъБР-м лъэпкъ Iуэхухэмрэ жылагъуэ проектхэмкIэ и министр КIурашын Анзор хъыбарегъащIэ IэнатIэхэм я лэжьакIуэхэм министерствэм и щIыхь тхылъхэр яритыжащ, зыпэрыт IэнатIэм къащыхуэщхьэпэну саугъэтхэр щIыгъуу.
- Хамэ къэралхэм щыпсэу ди хэкуэгъухэм ящыщу адэжь щIыналъэм къэзыгъэзэжахэр къызэрытхэзэгъэжам, адрейхэми къагъэзэжыну тезыгъэгушхуэ фи лэжьыгъэхэр уасэ зимыIэщ. Аращ журналистхэм гулъытэ фхуэтщIын хуейуэ къыщIэтлъытэр. Фызыпэрыт IэнатIэр жылагъуэр ефIэкIуэным, мамырыгъэрэ зэгурыIуэныгъэрэ илъыным адэкIи къызэрыхуэвгъэсэбэпынум шэч хэлъкъым, - жиIащ КIурашын Анзор. - Зэпеуэм фызэрыхэтам папщIэ фIыщIэ фхузощI! Ди зэхьэзэхуэхэм иджыри фи зэфIэкI фыщеплъыжыну, нэхъыбэу фыкъыхыхьэну фыкъыхудоджэ, етIанэгъи абы пытщэну ди мурадщи.
«Газетым къытехуа тхыгъэ нэхъыфI» зи Iэдакъэ къыщIэкIауэ къалъытар «Международный черкесский вестник» газетым и корреспондент Фырэ Анфисэ (тхыгъэм и лъабжьэм щIэт сурэтыр) (3-нэ увыпIэ), «Горянка» газетым и редактор Къарэлъашэ Алёнэ (2-нэ увыпIэ), «Адыгэ псалъэ» газетым политикэмкIэ жылагъуэмрэ лъэпкъ IуэхухэмкIэ и къудамэм и редактор НэщIэпыджэ Замирэ (1-нэ увыпIэ) сымэщ.
«Радионэтын нэхъыфIу» къыхагъэщащ Къэбэрдей-Балъкъэр Республикэм и радиом и корреспондентхэу Уэлджыр Аринэ (3-нэ увыпIэ), Жыгуэ Иннэ (2-нэ увыпIэ), Уэзрокъуэ Саният (1-нэ увыпIэ).
«Теленэтын нэхъыфIым» къыщыхэжаныкIащ «КъБР-Медиа» къэрал кIэзонэ IуэхущIапIэм и «1 КъБР» телевиденэм и лэжьакIуэхэу Атмурзаев Расул (3-нэ увыпIэ), Жэрыщты Залинэ (2-нэ увыпIэ), ТIымыжь Владимир (1-нэ увыпIэ).
Министерствэм и щIыхь тхылъыр хуагъэфэщащ «КъБР-Медиа» къэрал кIэзонэ IуэхущIапIэм и «1 КъБР» телевиденэм и лэжьакIуэ Жэман Мадинэ. Апхуэдэу министерствэм и фIыщIэ тхылъыр иратащ «Адыгэ псалъэ» газетым егъэджэныгъэмкIэ и къудамэм и редактор Жыласэ Маритэ (ищхьэмкIэ тет сурэтыр). Жэман Мадинэ журналистхэм къабгъэдэкIыу министерствэм фIыщIэ хуищIащ я лэжьыгъэм и пщIэр къызэралъытэм папщIэ.
ТЕКIУЖЬ Заретэ.
Сурэтхэр Къарей Элинэ трихащ.
