Орус география обществону (РГО) жаш тёлю къымылдаууну айныууна салгъан уллу къыйыны ючюн «Созидание» жамауат биригиуню башчысы краевед, журналист Мокъаланы Тенгиз обществону жаш тёлю клубуну биринчи даражалы белгиси бла саугъаланнганды. Белгини анга къууанчлы халда РГО-ну Москвада жаш тёлю бла ишлеу жаны бла департаментни башчысы Антон Юрманов бергенди. 

Жаш тёлю бла жетишимли ишлегени ючюн Тенгиз ары дери РГО-ну президенти Россейни къоруулау министри Сергей Шойгуну сыйлы грамотасына бла обществону доммакъ майдалына тийишли болгъанды, энчи стипендияны алгъанды.
Мокъаланы Тенгиз Орус география обществону «Альтаир» жаш тёлю клубуна 2017 жылдан бери башчылыкъ этеди, «Альтаир» кеси уа граждан обществону айныууна болушхан «Созидание» биригиуню мурдорунда къуралгъанды. Клубну ишини баш мураты ёсе келген тёлюлеге къыралыбызны географиясыны, тарыхыны эм маданиятыны юсюнден билим бериудю, ала миллет ёхтемлигибиз болгъанына тюшюндюрюудю. Аны чегинде сабийлени эм жаш адамланы фахмуларын ачыкълауду, аланы Ата журтха сюймекликге юйретиудю, туризмни, жамауат жашаугъа тири къатышыуну хайыры бла саулукъ жашау бардырыргъа кёллендириудю. 
Ёсе келген тёлюлеге интеллектуал оюнла, сейирлик жолоучулукъла, тюбешиуле, эришиуле къураладыла, аланы барысын да тамамларгъа методика  эм информация себепликни уа РГО этеди. Жангызда 2023 жылда ол «Альтаир» обществону, Президент грантны эм талай башха организацияны себепликлери бла «Къоркъуусузлукъну школу» билим бериу, «Тауланы накъут-налмасы» этнография эм «Хорламны жоллары бла» патриот проектлени бардыргъанды. 
«Альтаир» клубну келечилери да – Гергъокъланы Алия, Къумыкъланы Альбина, Алия Аль-Сайг бла Алина Бочарова – РГО-ну жаш тёлю клубуну экинчи даражалы белгилери бла саугъаланнгандыла.  

Кульчаланы Зульфия.