2018 жылдан бери «Назы терекдеги муратла толадыла» акция, битеу къыралдача, бизни республикада да кенг халда бардырылады. Къабарты-Малкъарда быйыл 15 ноябрьде аны «Биринчилени къымылдаулары» регион жамауат организация башлагъанды. Ол февральны ахыр кюнюне дери бардырыллыкъды. Анга къатышыргъа сюйгенле ёлкажеланий.рф сайтха кирип, толу хапар алыргъа боллукъдула. Проектге огъурлу ишле этерге сюйген мингле бла адамла къатышадыла. Аны чеклеринде жыл сайын РФ-ни Президенти Владимир Путин, КъМР-ни Башчысы Казбек Коков да сабийлени тилеклерин толтуруу жумушлагъа къошуладыла.
Акция эки кезиуде бардырылады. Офлайн – сабийле сюйген затларын жазып, терекге тагъадыла, ол терекле офиследе эмда уллу ишле бардырылгъан майданлада орнатыладыла. Алада ишлегенле эмда келгенле тамамларгъа къолларындан келген тилекни сайлап алыргъа боллукъдула. Онлайнда уа – болушургъа излеген адам ахчасына кёре саугъа этерге эмда сюйген регионун сайлап, аны ары жиберирге боллукъду.
«Назы терекдеги муратла толадыла» акция жандауурлукъ этерге сюйген мингле бла адамланы бирикдирликди. Жашчыкъла бла къызчыкъла, этген муратлары толурча, аланы башда айтылгъан сайтха жиберирге керекдиле, биз а аланы тилеклерин тийишли жерлеге тапдырып, ала толурча мадарла этерикбиз»,- деп белгилегенди «Биринчилени къымылдауларыны» правленини председатели Григорий Гуров.
Акцияны къурагъанла белгилегенлерине кёре, сабийле эсде да болмай тургъан саугъаланы айтыргъа да боладыла. Андан сора да, ала китапла, музыкалы инструментле, спорт керекле эмда кийимле, илляула, келе тургъан Жангы жылны байрамына къатышыргъа костюмла болургъа да боллукъдула. Дагъыда сабийни ырысхы жаны бла муратын толтурур онг барды. Сёз ючюн, Москвагъа жолоучулукъгъа барыргъа неда Жангы жылны байрамына билет алыргъа, космонавт бла тюбешиуню къураргъа да.
Акцияны хайырындан огъурлу иш этерге сюйген инсанла жандауурлукъ изленнген къауумлагъа болушурукъдула. Анга, энчи адамладан сора да, коммерциялы организацияла, къырал учрежденияланы келечилери да къошулургъа боллукъдула.
Эсге салайыкъ, бу акцияны хайырындан, 2022 жылда 47 минг сабийни эмда жашауу келген адамны мураты толгъанды. Озгъан жылда 2021 жылдан эсе он мингнге кёп адамны къууандырыр онг табылгъанды. Битеу да беш жылны ичинде уа 107 минг адамны мураты толгъанды.
Алайды да, бу акциягъа къатышыргъа ыразылыкълары болгъанланы барын да ашыгъып сакълайдыла. Аны юсюнден бизге «Биринчилени къымылдаулары» регион организацияны председателини орунбасары Валерия Баваш билдиргенди.
Далхатланы Марзият
