Адыгэ щэнхабзэмрэ гъуазджэмрэ я дунейпсо фестивалым хэтыну Тыркум къэкIуа гупыр япэ махуэм иригъэблэгъащ Мараш къалэм и унафэщIым. Къэбэрдей-Балъкъэрым щэн­хабзэмкIэ и министр Къу­махуэ Мухьэдинрэ Эркоч Фатхьи Мехметрэ щIыналъитIым я щэн­хабзэ зэпыщIэныгъэ­хэм, адыгэ хэхэсхэмрэ хэкурысхэмрэ я зэкъуэ­шыныгъэм, нэгъуэщI Iуэху дахэхэми теп­сэ­лъыхьахэщ.

Эркоч Фатхьи Мехмет дихьэхащ «Адыгэ лъэп­къым и хъугъуэфIыгъуэ» цIэр зезыхьэ «Кабар­динка» къэрал ансамб­лым хэт щIалэ уардэхэм, пщащэ зэкIужхэм, адыгэ фащэм.
Мараш хьэщIэ зэри­- Iэр, нэгъуэщI лъэпкъхэ-ми Гёксун щекIуэкIыну  Адыгэ щэнхабзэмрэ гъуаз­джэмрэ я дунейпсо фестивалым хэтынухэр ялъагъуну зэрыхуейм къы­хэкIкIэ, япэ пщы­хьэ­щхьэм вилайетым и къалэшхуэм и утыкур игъэбжьыфIащ «Кабардинка» къэрал академическэ ­ансамблым.
КхъухьлъатитIкIэ уэгур зэпызыупщIу зы жэщ-­махуэкIэ гъуэгу тета ансамблым ауи къыте­мы­хьэлъэу зы сыхьэт псокIэ концерт итащ, мараш­дэсхэр къыдихьэхарэ я дэрэжэгъуэр къиIэтауэ. Хамэм къыхуаIэт Iэгуа-уэр инт «Кабардинка»-м, адыгэм и пщIэр зэриIэтыр нэхъ иныжт.