Коммунал службадан келгенме деген хар кимге да эшикни ачаргъа ашыкъмагъыз. Ол адам хыйлачы болургъа боллукъду.

Аманлыкъчыла «счётчиклени неда башха приборланы алышыргъа керекди» деген сылтау бла кёбюсюнде абаданланы алдайдыла. Угъай дегенлени уа тазирле бла къоркъутургъа кюрешедиле. Ол адам керти ишчимиди огъесе хыйлачымыды – аны къалай билирге боллугъуну юсюнден Роскачествода айтхандыла.

Тинтиулени юсюнден

Планнга тюшген тинтиуле анга тийишлиликде бардырыладыла. Аланы юсюнден адамлагъа аллындан окъуна билдиредиле. Кёбюсюнде уа быллай жумушланы инсанланы заявкалары бла тамамлайдыла, бегирек да иш счётчиклени алышыу бла байламлы эсе.

Аварияланы юсюнден айтханда уа, диспетчерле ала къайда болгъанларын кеслери да билиучюдюле.

Хыйлачыны не зат ачыкълайды?

Не жумуш бла келгенлерин жик-жиги бла айтып ангылаталмайдыла.
Аберилеге къараргъа келген сылтауну тутуп, юйге кирирге кюрешедиле.
Оборудованияны мычымай алышыргъа керекди, дейдиле.
Ахчаны алагъа тёлегиз деп къысадыла.
Эсигизде тутугъуз:

Керти ишчиле оборудованиягъа сизге тап заманда къараргъа хазырдыла.
План бла бардырылгъан тинтиу ючюн абери тёлерге керекмейди. Алышыннган оборудованияны багъасын а квитанция алып артда тёлерге боллукъду.
Хыйлачы айтханнга алдансагъыз, жаланда ахчагъыздан угъай, тап ишлей тургъан оборудованиядан да къуру къалыргъа боллукъсуз.

Керти коммунальщик келсе уа?

Юйде авария болмагъан эсе, сюйсегиз, анга эшикни да ачмагъыз.

Къагъытларын соругъуз. Удостоверениясында аты эмда тукъум аты, организацияны аты эмда мухуру, дагъыда ИНН эмда ОГРН болургъа керекди.

Не жумуш бла келгенин сорургъа эркинсиз: ишчини къолунда тийишли къагъыты болургъа керекди.

Документлени барын да суратха алыгъыз, ол адамны уа юйге кийирмей, организациягъа сёлешип жумушун-борчун соругъуз.

Эшик аллында хыйлачы сюелгенин ангылагъан эсегиз, 112 неда 102 номерледен бирине сёлешип полицияны чакъырыгъыз.

Улбашланы Мурат.