Жаш тёлю проектлени Битеуроссей конкурсуна къатышып, Къабарты-Малкъар къырал аграр университет саулай къыралда быллай эм иги юч вузну санына тюшгенди. СКФО-да бийик билим бериу учрежденияланы арасында уа ючюнчю жерге тийишли болгъанды. Аны бла КъМКъАУ 7,1 миллион сом къоллу болгъанды. Университетден билдиргенлерине кёре, бу ахча жаш тёлю проектлени тындырыргъа къоратыллыкъды.
Университет жарашдыргъан тёрт проектни жаш тёлюню ишлери жаны бла Федерал агентствода (Росмолодёжь) дурус кёргендиле. Ала кеслери да жашау болумну тюрлю-тюрлю сфералары бла байламлыдыла. Сёз ючюн, «Мероприятия, направленные на развитие надпрофессиональных навыков» деген номинацияда Хочуланы Зухура «Молодёжный клуб с международным участием «Профессионалы будущего» деген проектин кёргюзтюп, бир миллион сомгъа тийишли болгъанды. «Молодёжные медиа» номинацияда уа Марина Бицуева таматалыкъ этип жарашдырылгъан «Молодёжный кинофестиваль «Мир глазами молодёжи» деген башламчылыкъ да аллай грант бла белгиленнгенди.
«Профилактика негативных проявлений в молодёжной среде и межнациональное взаимодействие» деген проектни чеклеринде университетде Мамырлыкъны ыйыгъы деген акцияны бардырырча 600 минг сом бёлюннгенди. Аны Мадина Кярова хазырлагъанды. Мусукаланы Владимир «Спорт, ЗОЖ, туризм» бёлюмде жарашдыргъан проектни тамамлаугъа уа 4,5 миллион сом берилгенди. Ол кеси да тюйюшюу искусствола жаны бла Шимал-Кавказ студент оюнланы бардырыу бла байламлыды.