Тогъузунчу ноябрьде Къулийланы Къайсын атлы къырал драма театрны артистлери Юг Осетия Республикагъа биринчи кере баргъандыла. «Гастрольла бла алышыу» программаны чеклеринде ала Цхинвалда Коста Хетагуров атлы къырал драма театрда «Ажашханла» спектакльни кёргюзтгендиле.
Къараучула чыгъарманы магъаналы болгъанын чертгендиле, къонакъланы келгенлерине да ыразылыкъларын билдиргендиле. Юг Осетия Республиканы Маданият министерствосу уа КъМР-ни сыйлы артисти Жангоразланы Фатиманы, режиссёр Мызыланы Аубекирни эмда баш артист Геляхланы Муратны грамоталары бла саугъалагъанды. Аланы бере, театрны башчысы Тамерлан Дзудцов: «Быллай жумушла бек магъаналыдыла. Ала адамлагъа танышыргъа, сезимлерин ёсдюрюрге да себеплик этедиле», – деп чертгенди.
Таулу артистле да сахна оюннга келгенлени жарыкъ тюбегенлерине да ыразылыкъларын айтхандыла. Мындан ары да быллай ахшы жумушла бола турурла деп ышаннганларын да билдиргендиле. Ызы бла Юг Осетияны драма театрына Къулийланы Къайсынны назму китапларын саугъагъа бергендиле.
Темуккуланы Амина.
