Къулийланы Къайсын атлы Малкъар къырал драма театрны артистлерини  спектакльлерине окъуучуланы чакъырыу ахшы тёреге айланнганды. Ол а ёсюп келген тёлюню адеп-къылыкъгъа, адет-тёреге, тилге да юйретиуде уллу магъананы тутады. Кёп болмай артистле бла аллай кезиулю тюбешиу болгъанды. Хасанияны 16-чы номерли мектебинде окъугъан жюзге жууукъ жаш бла къыз устазлары бла бирге театргъа келип, белгили артист Мызыланы Аубекир Токумаланы Жагъафарны чыгъармасына кёре салгъан сахна оюннга къарап, зауукълукъ тапхандыла. Анга уа спектакльден сора  окъуучуланы бла устазланы айтханлары шагъатлыкъ этеди.

«Театрны эрттеден бери да жокъламай тура эдим да, бюгюн керти да солуп, уллу зауукълукъ алып барама. Кюлкюлю оюн, сагъышларынгы чачады. «Бай келин»  осал къылыкълы адамны аламат ачыкълайды, ол санда аны жутлугъун да. Оюнну баш магъанасы, мен оюм этгенден, буду – байлагъа сукъланып жашагъан ёмюрюн жарлылыкъда ётдюреди. Токумаланы Жагъафар бу хапарын иги кесек жыл мындан алгъа жазгъан эсе да, ол бусагъатдагъы жашаугъа да келишеди. Байлыкъдан башха жукъ кёрмегенлеге бюгюн да тюбей турабыз. Мен спектакльни баш жигитин ойнагъан Жангоразланы Фатиманы бек жаратханма, ол керти да адам ийнанырча, аламат  ойнагъанды», – дегенди  класс башчы Темуккуланы Нюржан Коккаевна.
– Бюгюн башха жумушум бар эди, алай театрны сайлагъанма. Бир да сокъуранмайма. Сейирлик  сахна оюн. Къаллай бир зат кёрдюм, мен билмеген ненча таулу  сёз эшитдим. Бютюнда бег а Шауаланы Орусбийни ойнагъанын жаратханма. Алай башха артистле да аламат уста  ойнагъандыла. Тюз да жашаудача. Классыбызда къызларыбызны бла жашларыбызны кёллери кётюрюлгенлерин кёргенме. Бир тюрлю сылтаула бла  театргъа келмей къалгъан тенглерибизге хапар айтырыкъбыз, – дегенди  8-чи классны окъуучусу Холаланы Далхат.
– Жангоразланы Фатима Заржанны сыфатын, ич дуниясын алай толу ачыкълагъанды!  Башха артистлерибиз да, ол санда  Шауаланы Орусбий, Жолабланы Тахир, Мырзаланы Солтан,  Мызыланы Таубий, Хамурзланы Танзиля, Темиржанланы Мариям фахмулу болгъанларын энтта да бир кере кёргюзтгендиле. Жаш артистле Гогуланы Арафат, Байтуугъанланы Светлана, Шидакъланы Фатимат, Жаппуланы Марат, Байдаланы Шахим, башхала да аладан артха къалмазгъа кюрешгендиле, – дегенди устаз Ногъайлыланы Фатимат Хажумаровна.  
Къараучула  оюнну  кезиуюнде жарыкъ кюлгендиле, къарслары бла да  артистлени кёллерин кётюргендиле.

Холаланы Марзият