КъБР-м и Iэтащхьэ КIуэкIуэ Казбек ехъуэхъуащ Къэбэрдей-Балъкъэрым щыщу «Зыгъэпсэхугъуэ иным» къыхэжаныкIа ныбжьыщIэхэм икIи дяпэкIи ехъулIэныгъэхэр яIэну зэригуапэр жиIащ. Зэхьэзэхуэм кърикIуахэр къыщагъэнэIуащ «Артек» дунейпсо сабий центрым щекIуэкIа «ИпэкIэ кIуэ!» урысейпсо зэхыхьэм.
Зэхьэзэхуэр Iыхьэ-Iыхьэурэ мази 8-кIэ екIуэкIащ, цIыху мелуани 3 хэтащ. Абыхэм ящыщу класс нэхъыжьхэм щIэс ныбжьыщIэ 1500-рэ кIэух зэIущIэм щызэныкъуэкъуащ.
Зэпеуэм пашэныгъэ къыщызыхьахэм ящыщщ Бахъсэн къалэ дэт 6-нэ курыт школым щIэс Иуан Аскэр (гъэсакIуэр Тырныауз дэт 5-нэ гимназием пэщIэдзэ классхэр щезыгъаджэ Абулькинэ Маргаритэщ); Налшык къалэм дэт 14-нэ гимназием щеджэ Текуев Валерэ (гъэсакIуэр Тырныауз дэт лицей №1-м физкультурэмкIэ и егъэджакIуэ Абулькин Рафаилщ); Налшык къалэ дэт 9-нэ курыт школым и еджакIуэ Шорохов Владимир (гъэсакIуэр эколого-биологие центрым и егъэджакIуэ Бердановэ Еленэщ).
НыбжьыщIэхэр гупу зэрылэжьэфыр къыщагъэлъэгъуащ. «Урысейм сропагэ» къыхуеджэныгъэм щIэту ахэр зэпеуэм и кIыхьагъкIэ пхыкIащ, кIэух зэIущIэм зи гугъу щащIар унагъуэ лъапIэныгъэхэрщ.
Зэхьэзэхуэм щытекIуахэмрэ пашэныгъэ къыщызыхьахэмрэ къехъуэхъуащ УФ-м и Президентым и Администрацэм и УнафэщIым и япэ къуэдзэ Кириенкэ Сергей, УФ-м егъэджэныгъэмкIэ и министр Кравцов Сергей, нэгъуэщIхэри.
Зэпеуэм и къызэгъэпэщакIуэщ ЩIалэгъуалэм я IуэхухэмкIэ къэрал агентствэр, «Урысейр IэмалыфIхэм я къэралщ», «Зыгъэпсэхугъуэ ин» АНО-хэр, «Пашэхэм я зэщIэхъееныгъэ» зэгухьэныгъэр. Зэхьэзэхуэр гъэ къэс йокIуэкI «Егъэджэныгъэ» лъэпкъ проектым хэту.
