Быйыл «Искусстволаны кечеси-2023. Россей бирикдиреди» деген маданият акция Халкъны бирлигини кюню бла бирге тюшюп  белгиленнгенди. Нальчикде да анга аслам эс бёлгендиле.

Алай бла Б. Пачев атлы сабий библиотеканы специалистлери бек гитче окъуучуларына «Гражданин Минин бла князь Пожарский» деген тарых экскурс къурагъан эдиле. Анга тынгыларгъа уа бир ненча шахар сабий садланы тамата къауумлары чакъырылгъан эдиле. Библиотекачыла алагъа  Минин бла Пожарский халкъны бирикдирип, Россейни тыш къыраллы жауладан къоруулауда къаллай магъананы тутханларыны юсюнден тынгылы хапар айтхандыла.

Ызы бла сабийле бирликни магъанасын неде кёргенлерини юсюнден айтхандыла. Россейни адамларына биригиулюк не берлигин да сюзгендиле. Шуёхлукъну юсюнден ушакъдан сора уа абаданла алагъа къагъытланы берип, жыртырларын тилегендиле. Сора къонакъла ол жумушну тамамлаялмагъандан сора, аны магъанасы бирикген халкъны ууатыр онг болмагъанын ангылатхандыла. Адамла кеслери алларына болсала уа, аланы хар бирин да энчи хорлар онг болгъанын юлгюде кёргюзтгенди. Анда да бирем къагъыт берип, жыртырларын тилегендиле… Ма алай бла къонакъбайла ёсюп келген тёлюге байрамны магъаналыгъын ангылатхандыла.

Сора къызчыкъла бла жашчыкъла Россейни картасыны сураты бла уллу пазлны жыйгъандыла. Анда къыралда белгили объектлени бла табийгъат эсгертмелени орнатыргъа да керек эди. Битеу бу жумушланы ала сюйюп тамамлагъандыла.

Дагъыда библиотекачыла къурагъан тематикалы кёрмюч бла ала уллу сейир бла шагъырейленнгендиле.

Къасымланы Аминат.