Урысей Федерацэм и Президент Путин Владимир ­УФ-м ШынагъуэншагъэмкIэ и Советым, Правительствэм, хабзэхъумэ IэнатIэхэм я унафэщIхэм ядригъэкIуэкIа зэIущIэм щыжиIахэр диIыгъащ КъБР-м и Iэтащхьэ КIуэкIуэ Казбек. 

ВидеоIэмалкIэ Къэбэрдей-Балъкъэрым и цIыхубэм защыхуигъазэм, КIуэкIуэ Казбек жиIащ: «Ди Президентым дунейм иджыпсту щекIуэкI­хэм я мыхьэнэр наIуэу къыдгуригъэIуащ, абыхэм япкъ иткIэ дызытетыпхъэ унэтIыныгъэхэри дигъэлъэгъуащ. 
Дуней псор кIэлъоплъ ­КъуэкIыпIэ Гъунэгъум къыще­кIуэкI гузэвэгъуэм икIи лажьэ зимыIэу хэкIуадэхэм я гур щIоуз. Апхуэдэщ Къэбэрдей-Балъкъэрым исхэри. ­КъухьэпIэ спецслужбэхэм, цIыху гупцIанэхэм я гумащIагъыр къагъэсэбэпу, Урысейм лъэпкъ, дин зэпэщIэувэныгъэхэр къыщагъэхъуну иужь итщ. 
Ди Президент Путин Владимир гурыIуэгъуэ дыдэу жиIащ Урысейм къыщыхъуа иужь­рей зэрыхьзэрийм лъабжьэ хуэхъуар къухьэпIэ спец­служ­бэхэм я мурад фIейр зэрыарар. 
Дэ зэи тщыгъупщэ хъунукъым Урысейм лъэпкъ куэд зэрисыр, дин зэмылIэужьыгъуэхэр зэрахьэу. Аращ ди къэралыгъуэм лъабжьэ, къару, купщIэ хуэхъури. Апхуэдэу щытынущ сытым дежи.
Президентым конституцэ ухуэкIэр хъумэн зэрыхуейр, цIыхухэм я щхьэхуитыныгъэм, лъэпкъ, дин зэгуры­Iуэ­ныгъэм хуэсакъын зэрыхуейр къыхигъэщащ. Ар зыми икъу­тэну хуиткъым. 
Дэ псом ди дежкIи лъапIэныгъэ нэхъыщхьэу щытар мамырыгъэрщ, зэкъуэтыныгъэрщ, зэгурыIуэныгъэрщ. Ахэр тхъумэн щхьэкIэ, дызэкъуэту дыпэщIэувэн хуейщ къару фIыцIэм. 
Шэч къытесхьэркъым Къэбэрдей-Балъкъэрым щып­сэу­хэм я нэхъыбэр ди къэралым и Президентым зэриакъы­лэгъум, и тегъэщIапIэхэри ­зэ­рыдаIыгъым. Ди гум щIы­хьауэ, дэ псори дыкIэ­лъоплъ ­КъуэкIыпIэ Гъунэгъум иджыпс­ту щекIуэкI гузэвэ­гъуэу цIыхухэр мин бжыгъэкIэ щаукIым. ЗэпэщIэтыныгъэм лажьэ ямыIэу хэкIуадэхэм дахуощыгъуэ. 
Ауэ гузэвэгъуэм уи фейдэ къыхэпхыну ухуежьэныр цIы­хугъэншагъэ егъэлеяуэ зэ­рыщытри къыдгуроIуэ. Къару щхьэхуэхэм къаугъэр нэхъри нэхъ гуащIэ ящIыну, зэрыхъу­кIэ лъэпкъ нэхъыбэ а бэ­лыхьым здыхалъэфэну зэ­рыху­щIэкъум нэгъуэщIу ухущытыфынукъым. 
А бзаджагъэ псори зыхуэу­нэтIар ди къэралым и лъэр щIахынырщ. Украинэм Урысейм къызэрезэуэн Iэмал къы­хэзыщIыкIа къару дыдэ­хэрщ ахэри къэзыгъэхъур. Iэмалу ягъуэтымкIэ ахэр ху­щIокъу цIыхубэ гъащIэр зэтракъутэну, лъэпкъ, дин зэхэгъэжыр къагъэубэлэцу, цIыхухэр зэщагъэхьэну. Я мурадым теIэбэн папщIэ, цIыху­хэм я гупсысэкIэр ягъэутхъуэну, хъыбарыпцI къагъэсэбэпурэ, езыхэр зы­хуей хьэргъэшыргъэм хашэну хэтщ. Ахэрщ нобэ лIы­хъужьыгъэ ­къигъэлъагъуэу зауэ губ­гъуэм ит Урысей Армэр зы­пэщIэтыр, абыхэм мин бжыгъэкIэ ди хэкуэгъу щIалэхэри яхэтщ. Дакъикъэ бжыгъэщ дэкIар апхуэдэхэм ящыщ куэдым къэралым и саугъэт лъапIэхэр зэрыратрэ. Абыхэм яхэлъ лIыгъэмрэ хахуагъэм­рэщ, хэкулI гуры­щIэмрэ цIыху­гъэ лъагэмрэщ ди Хэкур сыт щыгъуи зыщыгугъыр. 
Ди адэхэм, адэшхуэхэм, абыхэм я адэжхэм щIэину къытхуагъэна а гупсы­сэ­кIэмрэ фIэщхъуныгъэмрэ но­бэ мыхьэнэщIэ ягъуэтащ, ахэрщ Урысейм и пщэдейрей махуэр мамыру щытын пап­щIэ, ди бынхэми абыхэм я быныжхэми лъабжьэ яхуэ­хъунур. Абы къыхэкIыу, псэ­емыблэжу тхъумэн хуейщ адэжь щIэинри ди япэ итахэм къытхуагъэна дуней тетыкIэ хабзэри. Мы дызыпхыкI щытыкIэ гугъум ди къэралым и нэхъыжьым иджып­сту дыкъызыхуриджэ пса-лъэ куп­щIафIэр Къэбэрдей-Балъкъэрым щыпсэу дэтхэнэ зыми игу зэрынэсынум шэч къытесхьэркъым. Дэтхэнэ бэ­лыхь­ми хэкIыпIэ зэриIэр къы­хэзгъэщыну сы­хуейщ, ауэ а Iэмалхэр къы­хэхын зэ­рыхуейр къэралым щызекIуэ ­хабзэхэм тетущ, республикэм щыпсэу псоми нэхъ къызэ­ращтэм хуэдэущ. Ди фIэщ­хъуныгъэр, зэкъуэ­тыныгъэр, зэгурыIуэр тхъу­мэурэщ мы зэман гугъум дызэ­рып­хы­кIыфынури, къэ­ралым и пащ­хьэ къиува мурадхэм дызэрыте­Iэ­бэ­фы­нури, Урысейри зи хуитыныгъэмрэ щхьэхуагъэмрэ щIэ­бэн адрей щIыналъэхэри ефIэкIуэн папщIэ. Апхуэдэущ Къуэ­кIыпIэ Гъунэгъум ще­кIуэкI­хэм дахущытын зэры­хуейр. Абы къыхэкIыу, ди ­къару псори а Iуэхум щы­щы­зэ­щIэд­гъэуIуэн хуейщ. Шэч къытесхьэркъым ар зэрытху­зэ­фIэкIынум. Дызэкъуэтмэ, псо­ри къыдэхъулIэнущ».