1950 гъэм щегъэжьауэ Кэнжэ къуажэм щылажьэ амбулаторэр здэщыIэ унэжьым и пIэкIэ щIэ щаухуэ. Мыбы я узыншагъэм щыкIэлъагъэплъыфынущ абы къепхауэ жылэм дэс цIыху мини 9-м щIигъум, икIи зы лэжьэгъуэ махуэм къриубыдэу цIыху 76-м хуэдизым щеIэзэну яхузэфIэкIынущ. Абы нэмыщI, махуэкIэ цIыхухэм я узыншагъэм щыкIэлъагъэплъу, хущхъуэхэр ирахьэлIэу щIэлъынухэм папщIэ гъуэлъыпIэ 12 щIагъэувэнущ.

УхуакIуэхэм амбулаторэщIэм и лъабжьэр ягъэтIылъауэ иджыпсту блынхэр дращIей. Ар иджырей мардэм къитIасэу яухуэнущ, зыхуей-зыхуэфI псомкIи къызэгъэпэщауэ. ЦIыхухэм я чэзур къыщысынум щыпэплъэну щIыпIэ щхьэхуэхэр къыхузэрагъэпэщынущ, дохутырым деж нэхъ тыншу зрагъэтхыфын папщIэ, абы хуэщIа Iэмэпсымэхэр ягъэувынущ.

Ухуэныгъэр ирагъэкIуэкI «Узыншагъэр хъумэн» лъэпкъ проектым хыхьэ «ЦIыхухэм япэу зызыхуагъазэ медицинэ IуэхущIапIэхэр егъэфIэкIуэн» щIыналъэ программэм тету икIи лэжьыгъэхэр зэфIагъэкIынущ 2025 гъэм и дыгъэгъазэ мазэм ирихьэлIэу.

                                                                      ХЬЭЩЫКЪУЕЙ Олег.