Къабарты-Малкъарда предприятияланы, учрежденияланы эмда кёп фатарлы юйлени келир къышха хазырлау бла байламлы иш быйыл жай келгени бла окъуна бардырылып башланнганды. Министерствола бла  ведомствола аны бла байламлы не мадар этгенлери Правительствода дайым контрольда турады, аны юсю бла кенгешле да бардырыладыла.
Алай бла бу кюнледе Правительствода, аны башчысыны орунбасары – КъМР-ни инфраструктура эмда цифровой айныу министри Владимир Болотоковну таматалыгъы бла кезиулю жыйылыу болгъанды. Анга кёп ведомстволаны бла службаланы эмда жер-жерли администрацияланы башчылары бла келечилери къатышхандыла.
Владимир Болотоков айтханнга кёре, къышха хазырланыу иш, артыкъ уллу тыйгъычла да болмай, тийишлисича бардырылады. «Сёзсюз, ол ахшы шартды, алай дагъыда энтта да этер иш кёп болгъанын а унутмазгъа керекди», - деп ол жашау журтла фондха, коммунал инфраструктурагъа, аны объектлерине тынгылы къараргъа, къыш сууукълада ток, жылыу, таза суу бла жалчытыуда чурумла болмазгъа кереклисин чертгенди.
Шёндюге дери этилген ишлени юсюнден КъМР-ни къурулуш эмда жол мюлк министрини орунбасары Гасташев Жамболат билдиргенди. Аны докладында айтылгъаныча, къыш кезиуге хазырланыугъа быйыл 577,1 миллион сом къоратыллыкъды. Ол санда жашау журтла – коммунал комплексде жумушлагъа - 115,3 миллион. Ток эмда газ бла жалчытыуда 138 эмда 65,5 бир сом багъасына мадар этилликди. ЖКХ-да предприятияла бла организацияла 251,2 миллион сом къоратырыкъдыла, жер-жерли администрацияла уа 81,4. Министерстволаны юсюнден айтханда, быллай ишге аладан ючюсю къатышыучудула: Саулукъ сакълау (22,1), Урунуу эмда социал къоруулау (3,6), Жарыкъландырыу, илму эмда жаш тёлюню ишлери жаны бла (1,6).
Районланы бла шахар округланы жер-жерли администрациялары белгиленнген ишлени 72 процентине тамам этгендиле. Аланы арасында Чегем, Черек эмда Элбрус районла аз-маз артха къаладыла. ЖКХ-да предприятияла бла организацияла уа борчларын жаланда 46 процентге толтургъандыла. Мында да сагъынылгъан юч районда эмда Нальчик шахар округда предприятияла артыкъ уллу тирилик кёргюзтмейдиле, деп белгилегенди Жамбола Гасташев.
Республиканы жашау журтла фондунда 2371 кёп фатарлы юй барды. Алада инженер системалагъа, ол санда таза суу, ток эмда газ бла жалчытыучулагъа ремонт этиу, коммуникацияланы жангыртыу ишле 71,3 процентине тамам этилгендиле. Мында бирсиледен артхаракъ къалгъанланы санында Нальчик бла Эльбрус район болгъанлыкъгъа, от жагъаланы тинтиу эмда жылыу бла жалчытыу быргъыланы уллу басым бла сынап кёрюу жаны бла уа тириликлери бла бир муниципалитет да ёхтемленирча тюйюлдюле.
Хайырланыуда болгъан 371 котельняны юсюнден айтханда, аланы хазырлыгъы 70 процентден атлагъанды, жылыу баргъан (491 километр) быргъыланы уа – 68 процент болады. Оборудованияны эмда быргъыланы алтмыш проценти тозурапды. Сёзсюз, аланы шёндюледе окъуна,къолдан келгенича къармашып, тап халгъа келтирирге керекди. Алай аны да болжалына салгъанла бардыла. Сёз ючюн, Нальчик шахар округда 6,7 километр чакълы эски быргъыладан,бюгюнлюкге жаланда 1,6 километри жангыртылгъанды. 
Министрни орунбасары белгилегенича, жер-жерли администрацияла бар ишлени толусунлай тамам этип, жашау журтланы къышха хазырлыкъларына шагъатлыкъ этген паспортларын -15 сентябрьге, жылыу бла жалчытыучу предприятияланы паспортларын а биринчи октябрьге дери алыргъа керекдиле.
Республикада жашагъанланы таза суу бла жалчытыу инфраструктурагъа бир суткагъа 607 минг кубометр берген - 543 водозабор,3860 километр быргъыла, сууну басым бла жиберген 263 объект киредиле. Хар адам бир кюннге 227 литр суу хайырланады, алай къоратылгъан а андан юч кереге кёп этиледи. Талай элледе жай кезиуде суу къытлыкъ сезиледи.
Ол а бу ресурсну эркинликсиз хайырланыу бла байламлыды. «Кёпле бахчаларын таза суу бла сугъарадыла. Алай этерге уа жарамайды, анга деп арыкъла, мелиорация амалла бардыла», - деп, Жамбулат Гасташев жер-жерли администрациялагъа быллай системаланы тап халгъа келтириуге энчи эс бурургъа чакъыргъанды.
Докладында министрни орунбасары хайырланылгъан энергоресурсла ючюн тёлеулени жыйыуну юсюнден да къысха шартла келтиргенди. Алай бла,адамла газ ючюн 4,070 миллиард сом берирге керекдиле. Ол санда бир миллиард сом быйыл биринчи алты айны ичинде къошулгъанды. Озгъан жылны бу кезиую бла тенглешдиргенде тёлеулени жыйыу он процентге кёбейгенди.
Жылыу бла жалчытыучу предприятияла быйыл 693 миллион сом багъасына газ кюйдюргендиле, алай аны ючюн жаланда 334 миллион сом тёлегендиле. Аланы санында белгиленнген кёрюмдюлеге жаланда тёртюсю жетгендиле: «Прохладный теплоэнерго», «Тепловин», «Теплоэнергетическая районная компания (Прохладный)»эм «Урвань теплосервис» акционер обществола. Иги да артха къалгъанланы санында уа докладчы «Нальчикни жылыу бла жалчытыучу компанияны», «Тырныауз теплоэнергону» сора  Звёздный эмда Элбрус элледе быллай биршер предприятияны белгилегенди.
Электрокюч ючюн хайырланыучуланы 1,054 миллиард сом борчлары барды. Ол санда 205,7 миллион сом быйыл къошулгъанды. Жашау журтла – коммунал предприятияла да бу жаны бла артыкъ уллу низамлыкъ кёргюзтмейдиле. Сёз ючюн, шёндю банкрот бола тургъан Нальчикде МУП «Водоканалны» 480,8 миллион сом берлиги барды.
Ахырында докладчы кёп фатарлы юйлеге тынгылы ремонт этиуде болум бла шагъырейлендиргенди. Быйылгъа белгиленнген ишле графикден кеч къалып бардырылгъанларын билдиргенди ол, аланы проект-смета документацияларын хазырлауда кемчиликле болгъанын да айтханды.
Владимир Болотоков хайырланылгъан энергоресурсла ючюн тёлеулени жыйыуну къолгъа алыргъа кереклисин чертип, анга жер-жерли администрацияланы башчылары жууаплы боллукъларын эсге салгъанды. Котельнялагъа, таза суу эмда жылыу бла жалчытыучу быргъылагъа ремонт этиуде да тирирек болургъа чакъыргъанды.