Кёп болмай  Звёздный аскер шахарчыкъда Росгвардияны бёлюмюнде къууанчлы жыйылыу ётгенди, жаш аскерчиле Ата журтларына керти къуллукъ этерге ант этгендиле.  Анга Росгвардияны офицерлери, ветеранла, аскер комиссариатны, Чегем районну администрациясыны, Мусулийманланы  дин управлениясыны келечилери эм жууукъ-ахлула да къатышхандыла.
– Бу кезиуден  башлап сиз кертиси бла да Ата журтугъузну  къоруулаучуларына саналасыз. Ол даражалы атны сыйын тюшюрмезге итинигиз, жууаплы болгъаныгъызны не заманда да  унутмагъыз. Кесигизни эм къатыгъызда нёгерлеригизге да сакъ болугъуз, – деп насийхат этгенди  аскер бёлюмню командири полковник  Нурид Макаев. 
Ызы бла аскер бёлюмню таматалары ата-анала бла тюбешгендиле, къуллукъну бардырыу халыны юсюнден айтхандыла, сорууларына жууапла бергендиле.