МазитI хуэдизкIэ узэIэбэкIыжмэ, ди къэралым и хъыбарегъащIэ IэнатIэхэм къатауэ щытащ Мэзкуу областым и «Химки» командэм хэту 2022 - 2023 гъэхэм Урысей Федерацэм и премьер-лигэм щыджэгуну зызыгъэхьэзыр Мырзэ Резуан Тыркум зыкъыщигъэлъэгъуэну зэрырагъэблэгъар. ЯпэщIыкIэ адыгэ щIалэм къыщIэупщIащ а къэралым и командэ «Сиваспор»-р, иужькIэ япэ лигэм щыджэгу «Генчлербирлиги»-р, нэгъуэщIхэри. Ауэ футболистымрэ командэхэмрэ зэгурыIуакъым щхьэусыгъуэ зэмылIэужьыгъуэхэм къыхэкIыу. Уеблэмэ, апхуэдэ щытыкIэм кърикIуэу, дигугъащ ди щIалэр мы илъэсым ди къэралым и командэ гуэрым щыджэгуну.
Ауэ иджы, наIуэ къызэрыхъуамкIэ, илъэс 30 зи ныбжь Мырзэ Резуан зы илъэс пIалъэкIэ зэгурыIуэныгъэ ирищIылIащ Азербайджаным и премьер-лигэм щыджэгу «Нефтчи» командэм. Клубым и пресс-IуэхущIапIэм къызэритамкIэ, ахэр куэд щIауэ кIэлъыплъащ ди щIалэм и джэгукIэм икIи ар къащэхуну абы щIэлъэIуащ тренер нэхъыщхьэ Муту Адриан. ЛъэныкъуитIыр зэпсалъэри, зэман кIэщIым къриубыдэу зэгурыIуэныгъэ зэращIылIащ.

«Мы командэм, зэрыжаIэу, сызэримыгугъауэ псынщIэ дыдэу сыкъыхыхьащ. Абыхэм я деж сыщагъэджэгуну хуейуэ куэд щIауэ срагъэблагъэрт, арати, псынщIэу дызэгурыIуащ.

«Нефтчи»-р командэ лъэщщ, тхыдэшхуэ зиIэщ. Ар къызгурыIуэу арэзы сытехъуащ къысхуагъэлъэгъуахэм. Гупым сызэрыхыхьэмкIэ зыми сечэнджэщакъым, унафэр сэ езым къэсщтэжащ. Иджыпсту къыспэщылъ къалэныр командэм сыдэIэпыкъунырщ.

Мыбы ипэкIэ сыщыджэгуа клубым есщIылIа зэгурыIуэныгъэм и пIалъэр икIэм щынэсам, сигу ислъхьат хамэ къэрал сыщыджэгуну. Ар мы-нобэмэ, атIэ, дапщэщ, жысIэри, си мурадыр зэзгъэхъулIащ», - жиIащ Мырзэ Резуан, «Нефтчи»-м зэрыхыхьам теухуауэ.

2023 - 2024 гъэхэм Азербайджаным футболымкIэ и премьер-лигэм щекIуэкIыну чемпионатым щIидзащ, командэхэми джэгугъуитху ирагъэкIуэкIащ. НобэкIэ «Нефтчи»-р ещанэ увыпIэм щытщ, очкоуэ 8 иIэу.

ХЬЭЩЫКЪУЕЙ Олег.