Тири солууну сюйгенле заманларын зауукълу ётдюрюрге Къабарты-Малкъарны, айхай да, сюйюп сайлайдыла. Жыл сайын бери Россейни, дунияны да жер-жерлеринден аслам турист келеди. Аланы солуулары тынчлыкълы ётерча, ачыгъаннга терк болушлукъ этилирча къутхарыучула да тохтаусуз усталыкъларын ёсдюредиле.
Бусагъатда да МЧС-ни Элбрус бийик тау къутхарыу-излеу отрядыны «Нальчик» бёлюмюнде къуллукъ этгенле жарау халда Бызынгыда Гестола таугъа (4860м.) ёрлегендиле, страховка станцияла да орната, къыйынлыгъына кёре «4-А» къауумгъа кирген маршрут бла баргъандыла.
- Жылны кезиую бла байламлы къаллай болумла кёп болгъанларына кёре къутхарыучула тюрлю-тюрлю жараулагъа барадыла. Ишлеринде аладан терк оноу эте билиу, къарыу, кишилик, кесини жашаууна къоркъуу бола тургъанлай башха адамны жанын сакъларгъа хазырлылыкъ изленедиле, - деп белгилейди бёлюмню башчысы биринчи класслы къутхарыучу Гюлюйланы Мухаммат.   
Жангыз да быйыл отряд 99 излеу-къутхарыу операциягъа чыкъгъанды, аланы кезиулеринде 105 адамны жашауун сакълагъанды. Жарсыугъа, кёпле таулагъа чыкъгъанда кеслерине асыры базынадыла, къоркъуусузлукъну жорукъларына уллу кёллюлюк этедиле, сора къыйын болумлагъа тюшедиле. Аны бла байламлы МЧС солугъанлагъа таула саулукъгъа бла жашаугъа къоркъуулу жер болгъанын эсгертеди эм барлыкъ жолларын эсепге салыргъа чакъырады. Жолоучулукъгъа чыгъардан алгъа, страховканы толтурургъа, спутник телефонну неда спутник GPS-трекерни алыргъа, ажашханда неда къыйын болумгъа тюшгенде не мадар этерге боллугъуну юсюнден алгъадан ойларгъа тийишлиди.

Кульчаланы 
Зульфия.