Ткаченкэ Андрей и цIэр зезыхьэ СурэтыщI гъуазджэхэмкIэ музейм щагъэлъагъуэ республикэм и сурэттеххэм я «Свой стиль» зэгухьэныгъэм хэтхэм я лэжьыгъэхэр.
Сурэттехи 9-м я лэжьыгъи 150-м щIигъу хагъэхьащ, сурэт, репортаж, архитектурэ, щIыуэпс жанрхэр къызэщIаубыдэу. Абыхэм куэду къощ дапщэщи удэзыхьэх гъэм и зэманхэм я теплъэгъуэ удэзыхьэххэр, псэущхьэхэр, къалэм и уэрамхэр, нэгъуэщIхэри.
«Свой стиль» клубыр къызэIузыха икIи и унафэщI Лукъяненкэ Иван хьэщIэхэм защыхуигъазэм жиIащ 2004 гъэ лъандэрэ я IуэхущIапIэр зэрылажьэр, иджырей выставкэр 19-нэу къызэрызэрагъэпэщыр.
- Гуапэщ гъэлъэгъуэныгъэм гъэ къэс къекIуалIэ цIыху нэфIэгуфIэхэм ди лэжьыгъэхэр ягу зэрыдыхьэр. Гъуэгу пэж дытету къыщIэкIынущ, - жиIащ Лукъяненкэ Иван. - Клубым хэтхэм я сурэтхэр кIуэ пэтми нэхъыфI, нэхъ щIэщыгъуэ мэхъу. Арагъэнущ абыхэм я лэжьыгъэхэм щIэупщIэм къащIыхэхъуэм и щхьэусыгъуэри.
Сурэттех Бекоев Геннадий жиIащ сабийр дунейм къызэрытехьэр гъащIэм и кIапэлъапэхэр къыщыгъэлъэгъуа сурэтхэр, фэеплъхэр пэлъытэу илъэс бжыгъэкIэ зэрахъумэр.
«Альтаир» урыс географие зэгухьэныгъэм и ЩIалэгъуалэ клубым и унафэщI, сурэттех Мокаев Тенджыз жиIащ есэжауэ махуэ къэс цIыхухэм я нэгу щIэкIхэм щIэщыгъуагъ храгъэлъэгъуэныр сурэттехым и къалэн нэхъыщхьэу зэрыщытыр. Аращ абы и лъапIэныгъэ нэхъыщхьэр. Мокаевым къыхигъэщащ зэпымыууэ щIэ гуэр я пащхьэм щагъэлъэгъуэным, я гукъыдэжым хагъэхъуэным зэрыхуэлажьэр. Ар къазэрехъулIэм и щыхьэтщ псалъэ гуапэу зэхахыжыр.
Выставкэм зыкърагъэхьэлIащ сурэттех гъуазджэм дихьэххэм, сурэттеххэм я благъэхэм, ныбжьэгъухэм. Ар фокIадэм и 17 пщIондэ щыIэнущи, гупыж зыщIхэм Iэмал фиIэщ а лэжьыгъэхэм феплъыну.
ТЕКIУЖЬ Заретэ.
Сурэтхэр КЪАРЕЙ Элинэ трихащ.
