Бу кюнледе «Къоркъуусуз эм качестволу автомобиль жолла» миллет проектге кёре,   «Элбрус» миллет паркда орналгъан  юйретиу-спорт базалагъа  «Шхелди» бла  «Джантуугъан» альплагерьлеге баргъан автомобиль  жолгъа тынгылы ремонт этилип бошалгъанды. 

Саулай алып айтханда, жангыртыу ишлени кезиуюнде 3,3 чакълы жер игилендирилгенди. Ол  спортчула эм туристледе да  тири хайырланнган социал-экономика магъаналы объектледен бири болгъанын да энчи белгилерчады. 

- Мен мында жыйымдыкъ къауум бла терк-терк сборлада  бола туруучума.  Ол кезиуде  жолну да тири  хайырланабыз,  жараула да бардырабыз. Энди ол омакъ эм къоркъуусуз  болгъаны бек къууандырады, - дейди  Москва областьдан келген къонакъ  Варвара Прохорова. 

Тынгылы ремонт ишлени кезиуюнде жолну мурдорун кючлегендиле, жауун суула саркъырча арыкъла, быргъыла,  бордюрла  жарашдыргъандыла, Шхелди сууну кёпюрюн жангыртхандыла, машинала сюелирча жерле къуралгъандыла эм  тынгылы асфальт да жайылгъанды. Къоркъуусузлукъну жалчытырча  да аслам эс бурулгъанды, ол санда темир буруула тартылгъандыла, жорукъланы билдирген белгиле эм ызла да салыннгандыла. 

 
- Объект тау жерде орналгъаны ючюн  эм къыйынланы бирине саналады. Аны  ары-бери бурулгъан  эм тёш,  эниш жерлери да кёпдю. Подряд организациягъа   иги кюч салыргъа тюшгенди, бютюнда асфальт жайгъанда.  Участокда тынгылы материалла эм жангы технологияла хайырланнганларын да энчи чертирчады.  Ишлени болжалындан кеч къалмай бошаялгъаныбыз бек къууандырады, – деп къошханды   республиканы жол управлениясыны баш инженери   Индар Тугов.