Байрым кюн РФ-ни МЧС-ини КъМР-де Баш управлениясыны таматасы Михаил Надежин юсюбюздеги жылны биринчи жарымыны эсеплерине  жораланнган пресс-конференция бардыргъанды. Ол билдиргеннге кёре, озгъан 6 айны ичинде республикада эки къыйын болумну чертирчады. Биринчиси, рейс автобусну авариягъа тюшгени, экинчиси уа - бу айны башында Бахсан сууну кётюрюлгени. Михаил Владимирович билдиргеннге кёре, табийгъат болумдан сора битеу тапландырыу ишле бошалгъандыла, хата  жетген коммуникацияла да терк окъуна ишчи халгъа келтирилгендиле.

 

Къабарты-Малкъарда от тюшюулени саны быйыл 249-гъа  жетгенди. Былтырны бу кезиую бла тенглешдиргенде, ол 7 процентге азды. 127-си уа адамла жашагъан жерледе болгъанды. Сатыу бардырылгъан мекямлагъа да от ёчюлтюучюле 14 кере чыкъгъандыла. Алгъаракъда 303 маданият объектде тинтиу ишле бардырылгъандыла. Аланы кезиуюнде иги кесек бузукълукъла ачыкъланнгандыла. Бюгюнлюкде аланы 60 проценти кетерилгенди.

 

Сабийлени жай солууларын жалчытхан учрежденияланы юслеринден айта, Михаил Надежин аланы барысы да тынгылы тинтилгенлерин  эсгертгенди. «Биринде  да бир бузукълукъ, кемчилик табылмагъаны бек къууандыргъан эди бизни», - дегенди ол.
   
Ызы бла докладчы чыранлада къарла былтырдан эсе 10 кюн алгъа эрип башлагъандыла, деп жарсыулу айтханды. «Алгъын биз артыкъ эс бёлмеучю Къая - Башы, специалистлени оюмларына кёре, бюгюнлюкде бек къоркъуулу  чыранладан бириди. Ол Огъары Бахсан элни башындады. Тырныауузгъа аны эриую уллу хата  жетдирирге боллукъду», - дегенди Надежин.

 

Гирхожан сууну халини юсюнден да хапарлагъанды. Аны башында орналгъан дежурный къауумла анда 15 августха дери, керек болса уа, андан ары да  турлукъларын билдиргенди.

 

Къутхарыу ишлени юслеринден айта, ведомствону таматасы быйыл аланы саны иги да аз болгъанын чертгенди.  Мен оюм этгенден,  аны сылтауу  туристле бла альпинистле сагъыракъ болгъанлары бла байламлыды. Алай жарсытхан кезиуле да бардыла. Сёз ючюн, бир ненча кюн алгъа Бызынгы таулада солугъан белоруслу альпинист къаядан кетип ёлгенди. Къутхарыучула аны бек теренден чыгъаргъандыла, кеси жанларына да къоркъуу салып, деп билдиргенди Михаил Владимирович.
 
Жай кезиуде адамла жууунуучу жерлени юслеринден айта, ол пляжла барысы да тийишли аттестацияны ётгенлерин эм сезон башланнганлы  кёлледе батхан болмагъанын билдиргенди.