Кардиология службаны иши бла шагъырейленирча В.А. Алмазов атлы миллет медицина тинтиу араны таматасы академик Евгений Шляхто Къабарты-Малкъарда болгъанды. Жолоучулукъну чегинде ол КъМР-ни Правительствосуну Председатели Мусукланы Алий, республиканы саулукъ сакълау министри Марат Хубиев бла тюбешгенди.
Евгений Шляхто тинтиу араны къаууму бла Кардиология араны, РКБ-ны Регионал къан-тамыр арасыны, 1-чи номерли шахар клиника больницаны кардиология бёлюмюню ишлерине къарагъандыла, ишни къуралыууна эс бургъандыла, назначение къагъытланы, карточкаланы жарашдырылгъанларын тинтгендиле.
Эки кюнню ичинде тири ишни эсеплерин сюзерча, академик Шляхтону башчылыгъында КъМР-ни Минздравыны аппаратыны, КъМР-де ОМС-ни фондуну келечилери, медицина махкемелени тамата врачлары, министерствону штатда болмагъан тамата специалистлери кенгеш бардыргъандыла. Къонакъла, республиканы кардиология службасыны ишин ачыкълап, бу жаны бла жумушну бирси россейли регионла бла тенглешдиргендиле. Эсеп кёрюмдюлеге кёре Къабарты-Малкъар субъектле арасында кесин ахшы ёсюуле жаны бла кёргюзтюп «жашил точкагъа» къошулгъанды.
2018 жылны эмда 2019 жылны биринчи кварталыны эсеплери кёргюзтгенича, къан жюрюген системаны аурууларындан ёлгенлени саны орталыкъ ёлчем бла алгъанда битеуроссейли болумдан 1,5 кереге азыракъды эмда андан да алаша бола барады. Башха кёрюмдюледе да хал осалды дерча тюйюлдю (битеу ёлгенлени саны, диспансеризация, инфарктны биринчи 12 сагъатында госпитализация, кардиологланы бла къан-тамыр хирургланы жетишгенлери эмда башхала).
Аны бла бирге эсгертиуле да этилгендиле, рекомендацияла берилгендиле, ала кардиология службаны ишин къурау бла байламлы эдиле, медицина болушлукъну тапландырырча къолайлыкъ, къан жюрюген системаны аурууларындан ёлгенлени санын азайтырча этилирге тийишли жумушла да белгиленнгендиле. «Республика саусузгъа бурулгъан болушлукъну юлгюсю болурча онгла бардыла», - дегенди ахырында Шляхто.
Марат Хубиев къонакълагъа регион бла байламлы бардыргъан жумушлары ючюн ыразылыгъын айтханды, биргесине уруннганлагъа бла штатда болмагъан специалистлеге В.А. Алмазов атлы миллет медицина тинтиу араны къауумуну эсгертиулерин бла рекомендацияларын жашаугъа кийириуню тири къолгъа алыргъа буюргъанды.
