КъМР-ни Башчысыны къуллугъун болжаллы халда толтургъан Казбек Коков Чегем районда болгъанында муниципал къуралыуланы администрацияларыны таматалары бла кенгеш бардыргъанды. Анда сёз халкъны суу бла чырмаусуз жалчытыуну юсюнден баргъанды.
Суу ызланы тинтиуню эмда тергеуню юсюнден алгъын берилген буйрукъла къалай толтурулгъанлары бла жыйылыуда КъМР-ни Правительствосуну Председателини орунбасары, инфраструктура эмда цифралы айныуну министри Владимир Болотоков, муниципал районланы администрацияларыны башчылары шагъырейлендиргендиле.Бюгюнлюкде, деп айтылгъанды кенгешде, толтуруучу властьны федерал органлары республикагъа «Таза суу» федерал проектге эмда «Эллени комплекс халда айнытыу» къырал программагъа кёре регионланы суу ызларын аз-аздан жангырта барыугъа бюджетден къошакъ ахча бёлюуню юсюнден вопросха къарай турадыла.
Болсада бир-бир элледе суу бла жалчытыу бла байламлы жумушну арт болжалгъа салыргъа арталлыда жарарыкъ тюйюлдю деп, Казбек Коков муниципалитетлени башчыларына Правительство бла бирге бу ишни тирилтирге, битеу болгъан онгланы хайырланыргъа, къошакъ ырысхы да мажарыргъа буюргъанды.