Тюнене Нальчикде Абхазия майданда «Аскер - 2019» деген Халкъла аралы аскер-техника форум башланнганды. Билдиргенибизча, ол юч кюнню ичинде бардырыллыкъды, эрттенликде сагъат ондан кюндюз сагъат экиге дери.
Бу кёрмюч шёндю Россейни битеу регионларында барады. Аны магъанасы да бек уллуду дерчады. Аны хайыры бла гражданла къыралыбызны аскер кючюн, ВПК-ны онгларын эм жангы техниканы кеслери кёзлери бла кёрюрге боллукъдула.
Кёрмючге кёп сауутланнган структурала къатышхандыла. Техниканы асламысы къоруулау министерствонуду: инженер, радиосвязь эм энчи аскерленики. Дагъыда МЧС-ни бёлюмлери: от ёчюлтюучюле, къутхарыучула да къатышадыла ары. Энчи къуралгъан экспозицияда «Кюн шахар» деген сабий чыгъармачылыкъ академияны техника кружокларыны келечилери келир заманланы аскер, алам, тенгиз оборудованиясы къаллай болуруна къарамларын эм оюмларын кёп тюрлю модельле жарашдырып кёргюзтедиле.
Форумну ишин РФ-ни 58-чи армиясыны командующисини аскер-политика иш жаны бла орунбасары, полковник Василий Зайцев ачханды. «Быллай кёрмюч республикада биринчи кере бардырылады. Мында къараучулагъа кёп сейирлик затла кёргюзтюрге муратлыбыз. Аланы юсю бла аскерибизни нечик уллу кючю болгъанын сезериксиз деп ышанабыз, ол къыралыбызны не тюрлю къоркъууладан да сакъларгъа боллугъун кёрлюксюз. Ма ала къурарыкъдыла сауутланнган кючлерибизни тамблагъы кюнюн. Аны техниканы эм жангы тюрлюлери бла жалчытыуну къыралны башчылары бек магъаналы борчха санайдыла. Ол себепден аскерни онгларын жангыртыу да тохтаусуз барады», - дегенди ол.
Аскерчилеге, форумгъа келген къараучулагъа да республиканы Башчысыны къуллугъун болжаллы халда толтургъанны эм кесини атындан салам бергенди Правительствону Председателини орунбасары Мурат Карданов. Кёрмючде къыралыбызны алчы конструкторларыны жангычылыкълары, шёндюгю техника да кёплени сейирлерин къозгъарыгъына ышаннганын билдиргенди ол, жаш тёлюге уа Ата журтну къоруулаучусу нечик уллу даража болгъанын толу сезериксиз, дегенди.
Бу ишни кезиуюнде, техникадан сора да, тюрлю-тюрлю энчи аскер бёлюмле хунерликлерин ачыкъларыкъдыла. Форум башланнганлай окъуна бир къауумну жесирге алгъан террористлени къалай хорларгъа кереклисин спецназ кёргюзтгенди. Анга сабийле угъай, тамата тёлю да бек сюйюп къарагъандыла, къарс къагъып ыразылыкъларын билдиргендиле.
Майданда экспозициялада къараучуланы кёп тюрлю бронетанковый техника, сауутла, автоматла, инженер оборудование, чачдырыучу затла, аны къой – ракета установкала окъуна сакълайдыла.
Уллу техниканы къатында суу тюбюнде жюзюучюлени, разведка этиучюлени, къутхарыучуланы экспозициялары къуралгъанды. Алада уа тюрлю-тюрлю юс кийимле, каскала, кёкде кеси аллына учуп, тёгерек-башны тинтип тургъан аппарат да. Снайперлени «Вал», «СВД» эм башха ушкокларын, эки километрге атхан «Корд» пулемётну къолларына алып, къатларында сюелип суратха тюшерча уллула, гитчеле да тизме-тизме болуп сакълай эдиле.
Аскерчиле алагъа бир да угъай демей, бу сауутла къайда эм къалай хайырланылгъанларын, аланы энчиликлерин бек тынгылы ангылатыргъа кюрешгендиле. Машиналаны ичине киреме дегенлеге да аллай онг берилмей къалмайды. Алайды да бу кёрмючде болмагъанла быллай сейирли затланы энтта да тамбла кёрюрге боллукъдула.
