КъМР-ни Правительствосуну юйюнде премьер-министр Мусукланы Алий Алмазов атлы Миллет медицина тинтиу араны директору, академик Евгений Шляхто бла тюбешгенди. Ушакъны кезиуюнде сёз республиканы саулукъ сакълау системасын аз-аздан жангырта барыуну, регионда кёп профильли бир багъыу-диагностика комплекс къурауну онгларыны юсюнден баргъанды. Тюбешиуге КъМР-ни саулукъ сакълау министри Марат Хубиев да къатышханды.
Къабарты-Малкъарны, деп чертгенди Е.В.Шляхто, инновациялы медицинаны айнытыугъа уллу онглары бардыла. «Бюгюнлюкде, республиканы халкъыны санын эмда излемин эсге алсакъ, терк, энчи эмда бийик технологиялы болушлукъ берген, сабийлеге, онкологиядан ауругъанлагъа бакъгъан службаланы, башха бёлюмлени да уллу федерал клиникаланы юлгюсюнде бирикдирип кёрюуню хайыры боллукъду»,-дегенди ол.
Къабарты-Малкъарда болгъанда Евгений Шляхто Къан тамырла эмда жюрек ауруулагъа багъыуну регион арасыны, биринчи клиника больницаны ишлери бла шагъырейленнгенди, КъМР-ни багъыу учрежденияларыны башчылары эмда специалистлери бла ушакъ бардыргъанды.