Налшык къалэм Профсоюзхэм я унэм иджыблагъэ щекIуэкIащ КъБР-м и МэкъумэшыщIэ (фермер) хозяйствэмрэ мэкъумэш кооперативхэмрэ я ассоциацэм и отчёт-хэхыныгъэ зэIущIэ. Абы кърихьэлIащ Къэбэрдей-Балъкъэрым и муниципальнэ районхэм я мэкъумэш лэжьакIуэу 100-м щIигъу.
Япэ Iуэхугъуэр дызыхуэкIуэ илъэситхум къриубыдэу ассоциацэм и унафэщIу щытынур хэхынырт. А къулыкъум ягъэувын папщIэ кандидату щы - «Албир» мэкъумэш кооперативым& и тхьэмадэ Алэкъей Инал (Шэ-джэм район), КъБР-м и фермер ныбжьыщIэхэм я союзым и пашэ Щоджэн Рустам, мэкъумэшыщIэ (фермер) хозяйствэхэм я ассоциацэм и Дзэлыкъуэ район къудамэм и унафэщI КIуэкIуэ Азрэталий сымэ къагъэлъэгъуащ. Иужьрейм и кандидатурэр Iэ щаIэтыным нэмысу езым Iуихыжащ. КъБР-м и Аккор-м и унафэщIу иджыри къэс лэжьа икIи зи полномочиехэм я пIалъэр 2019 гъэм и гъатхэпэ мазэм икIа КъардэнгъущI Къазбэч хэхыныгъэхэм къыхыхьакъым.
ЗэIухауэ Iэ зэраIэтам кърикIуахэм япкъ иткIэ фермерхэм я щIыналъэ ассоциацэм и унафэщIу Алэкъей Инал хахащ икIи абы и пщэ иралъхьащ мы жылагъуэ зэгухьэныгъэм и унафэщI органхэр къызэригъэпэщыну.
Алэкъей Инал республикэм и АПК-м и IэщIагъэлI, унафэщI нэхъ жыджэрхэм ящыщщ. Абы къызэригъэпэща «Албир» мэкъумэш кооперативыр илъэс куэд лъандэ-рэ Къэбэрдей-Балъкъэрым и хозяйствэ нэхъыфIхэм ящыщщ. Езым мы IэнатIэм пыщIа щIэныгъэ нэхъыщхьэу тIу иIэщ, илъэс 40 лъандэрэ мэкъумэш лэжьыгъэм хэтщ. Къэбэрдей-Балъкъэр Республикэм мэкъумэш хозяйствэм-кIэ щIыхь зиIэ и лэжьакIуэщ, Урысейм Мэкъумэш хозяйствэмкIэ и министерствэм, КъБР-м Мэкъумэш хозяйствэмкIэ и министерствэм я щIыхь тхылъхэр къратащ.
Отчёт-хэхыныгъэ зэIущIэм щIэсащ КъБР-м мэкъумэш хозяйствэмкIэ и министрым и къуэдзэ Уэдыхь Тимур, район администрацэхэм мэкъумэш хозяйствэмкIэ я управленэхэм я унафэщIхэр, цIыхубэ хъыбарегъащIэ IуэхущIапIэхэм я лIыкIуэхэр.
