РусГидро компанияны болушлугъу бла Къабарты-Малкъарда акъылбалыкъ болмагъанланы арасында футболдан битеуроссей турнир бардырылгъанды. Эришиуле СССР-ни бу оюндан чемпиону Александр Апшевге жораланнган эдиле, деп билдиргендиле компанияны КъМР-де бёлюмюнден.
Турнирге 2006 жылда туугъанла къатышхандыла. Мында кючлерин сынаргъа бизни республикадан, Дагъыстандан, Шимал Осетиядан, Ингушетиядан, Астрахань областьдан эм Краснодар крайдан битеуда сегиз къауум келгенди. Сау ыйыкъны ичинде ала, алышына кетип, бир бирлери бла жетишер кере ойнагъандыла.
Алай бла эм иги балла бла биринчи жерге Махачкъаладан «Анжи» футбол академияны командасы тийишли болгъанды. Экинчини «Спартак-Нальчик» сабий спорт школну келечилери алгъандыла. Ючюнчю жерге уа Нальчикден Александр Апшев атлы «Эльбрус» спорт школну къаууму чыкъгъанды.
Хорлагъанлагъа эмда призёрлагъа кубокла, майдалла эм грамотала берилгендиле. Кеслерин бютюн тири кёргюзтген жаш футболчула уа энчи саугъала къоллу болгъандыла. Бек уста бомбардирге жети топ ургъан Осман Минатулаев («Анжи») саналгъанды. Вратарьланы арасында уа Курбан Лутов махтаугъа тийишли болгъанды. Ол Прохладный шахарны сабий спорт школуну келечисиди.
Эм иги къоруулаучу Тамерлан Хубиев («Эльбрус») болгъанды, айырмалы жарым къоруулаучу деб а Никита Клыгинни (Астрахань ш., «Волгарь» команда) белгилегендиле. Ахырында эм иги чабыуул этиучюню сайлагъандыла. Ол даражагъа «Спартак-Нальчик» команданы келечиси Кантемир Абазовну тийишли кёргендиле.