Автомашинаны сатып алгъан адам аны кеси атына жаздырыргъа керекди. Ол этилмесе, аны алгъын иесине налог келгенлей турлукъду. Нек дегенде ФНС-ни бла ГИБДД-ны базаларында машина аны иелигинде къалады.
Жангы ие автомашинаны кесини атына жаздырмай эсе, аны сатхан адам ол мюлкню кесини юсюнден кетерирге боллукъду. Алай этерча ГИБДД-гъа барып заявление жазаргъа керек эди алгъада. Энди уа бу жумушну, юйден да чыгъа айланмай, «Госуслуги» къырал порталда тамамларгъа боллукъду. Инспекциядан бу информация ызы бла Налогла службагъа жибериледи, аны бла машинаны алгъын иеси тёлеуледен эркин болады. Дагъыда бир эсгериу: бу иш айны онбешинчисинден сора этилсе, налогну толу ай ючюн тёлерге тюшерикди.
Алай бла, сагъынылгъан Порталда заявление жазып, битеу керек документлени (сатыу-алыу этилген келишимни копиясын эмда ол къачан этилгенини кюнюн, СТС-ни номерин) кёргюзтюрге керекди. Ол бары да хакъсызды. Ызы бла, инспектор аны дурус кёрсе, сизни анда «энчи кабинетигизге» билдириу келликди.
Автомашинаны регистрациясын тыйыу эмда учётдан тешиу – ол бир бирине ушашлы жумуш тюйюлдю! Закон аны башха-башха кёреди.
Регистрация тыйылгъаны машинаны иеси алышындырыллыгъын кёргюзтеди. Аны юсюнден битеу информация базадан бир жары да кетерилмейди. Автомобиль учётдан тешилсе уа, ол болмагъаннга саналады. ГИБДД-да аны бла байламлы информация архивге жибериледи, номерлери да къырылып кетериледиле. Бу иш техниканы тыш къыралгъа чыгъаргъанда неда утилизациягъа жибергенде этиледи.
Сиз сатхан машинаны жангы иеси аны регистрациясын аман акъылдан (тазирлени, налогланы тёлемез ючюн) этмей тургъан сунмагъыз. Ким биледи, ол аурупму къалгъан болур неда алай этерге кереклисин билмей тура болур, жашауда аз тюрлю зат болмайды. Аны ючюн техниканы сатардан алгъа алыучугъа аны да толуракъ ангылатыргъа кюрешигиз.