«Библиотекэхэм я жэщ» урысейпсо Iуэхум хыхьэу, Мэлбахъуэ Тимборэ и цIэр зезыхьэ Лъэпкъ къэрал библиотекэм техникэ, мэкъумэш литературэхэмкIэ и къудамэм щекIуэкIащ «Слово во славу учителя» зэхыхьэр. Ар теухуауэ  щытащ УФ-м и Президентым 2023 гъэр ЕгъэджакIуэмрэ унэтIакIуэмрэ я илъэсу зэригъэувам.

Зэхыхьэм ирагъэблэгъащ КъБР-м и Сату-технологие колледжым и унафэщIым егъэджэныгъэ-гъэсэныгъэ лэжьыгъэхэмкIэ и къуэдзэ Хьэцым Iэсиятрэ егъэджакIуэ Уэртэн Лусенэрэ, я студентхэр ящIыгъуу.

ЗэIущIэр езыгъэкIуэкIар библиотекэм и къудамэм и унафэщI Срыкъуэ Фаридэщ. Ар кIэщIу тепсэлъыхьащ егъэджакIуэ IэщIагъэр къызэрыунэхуамрэ зэрызиужьамрэ, абы цIыхубэм и деж иIэ мыхьэнэмрэ пщIэмрэ, щIэныгъэ зэрыритым къыдэкIуэу, еджакIуэхэм ар гъуазэ, чэнджэщэгъу зэрахуэхъур.

Фаридэ студентхэм еущиящ я Iыхьлыхэм, я щIыналъэм, къэралым хуэщхьэпэну IэщIагъэ зэрагъэгъуэтыну, зэпымыууэ я щIэныгъэм хагъэхъуэну, ар зрагъэхъулIэн папщIэ библиотекэм щIэх-щIэхыурэ къекIуэлIэну.

Хьэцым Iэсият егъэджакIуэ IэщIагъэр къыщIыхихам и гугъу щищIым, игу къигъэкIыжащ я щIалэгъуэм мы библиотекэр я кIуапIэу зэрыщытар. Зэхыхьэм къекIуэлIахэр абы экранымкIэ хигъэгъуэзащ я колледжым и къудамэхэм, зыхуеину иджырей IэмэпсымэхэмкIэ къызэрызэгъэпэщам, нэгъуэщIхэми.

Студентхэр егъэджакIуэхэм ятеухуа усэхэм къеджа нэужь, лъэпкъ шхыныгъуэхэр пщэфIынымкIэ мастер-класс ятащ.

ТЕКIУЖЬ Заретэ.