Къабарты-Малкъарны келечилери алгъаракъда Тула областьда болгъанларында республиканы туризм эм санатор-курорт кластерлерини презентациясын бардыргъан эдиле. Анга КъМР-ни курортла эмда туризм министри Мурат Шогенцуков, «Курорт Элбрус» акционер обществону таматасы Беккаланы Хыйса, «Чайка» санаторийни таматасы Алим Закураев, Тула областьны экономиканы айнытыу министрини орунбасары Вячеслав Романов, анда туризмни айнытыу жаны бла комитетни бёлюмюню таматасыны орунбасары Елена Алексеева, регионну туроператорларыны бла турагенстволарыны, Социал страхование фондуну, спорт эм профсоюз организацияланы келечилери да къатышхандыла.

Тюбешиуде Вячяслав Романов Тула областьны Правительствосуну атындан къонакълагъа ыразылыгъын билдире, туризм жаны бла арада байламлыкъ къурауну уллу магъанасы болгъанын чертгенди. Елена Алексеева уа областьны туризм жаны бла онгларыны юсюнден билдирип, коллегаларына «Тула областьны къонагъыны карталарын» бергенди.

Мурат Шогенцуков Къабарты-Малкъарда солургъа эмда саулукъларын игилендирирге къаллай онгла болгъанларыны, туризм жаны бла регионну энчилигини юсюнден да толу хапар билдиргенди. Жыйылыуда эки къауум да мындан арысында туризм сферада бирге ишлерча амалланы сюзгендиле. Алай бла энди анда белгиленнген ишлени тамамлар ючюн, жууукъ заманда власть органла тийишли келишимле къураргъа керекдиле.