Малкъар халкъны жангырыу кюнюне аталып, Нальчикни универсал спорт арасында боксдан битеуроссей эришиуле бардырылгъандыла. Алагъа 22 региондан, ол санда Архангельск, Воронеж, Владимир, Омск, Ростов эм башха областьладан, СКФО-ну республикаларындан, Ямало-Ненецкий автоном округдан, 19-40-жыллыкъ 75 спортчу къатышхандыла.  

Республикабызны атындан 19 боксчу – спортну устасына кандидатла – сермешгендиле. Кеслерини ауурлукъ къауумларында Забакъланы Алим Рустам Губжоков, Макытланы Хасан хорлагъандыла. «Кюмюшлени» Жарашууланы Магомет бла Тамерлан Бляшев къытхандыла. Рустам Хакуашев, Макытланы Анзор, Хажсет Агоев, Айдамир Шомпаров, дагъыда талай спортчу ючюнчю жерлени алгъандыла. Аланы тренерле Гергъокъланы Ахмат, Чаналаны Мусса, Гуртуланы Солтанбек, Къудайланы Алибек, Элбайланы Владимир, Кучменланы Аслан эм башхала юйретедиле.

Россейни спортуну устасы деген атха нормативни Макытланы Хасан бла Забакъланы Алим толтургъандыла. Эришиулени эм иги боксчусуна Дагъыстандан Хасмагомед Джаватханов саналгъанды, хорламгъа итиниулюгю ючюн нальчикчи Тамерлан Бляшев белгиленнгенди, эм иги техникасы ючюн а энчи Забакъланы Алим саугъаланнганды.

Кульчаланы Зульфия.