Ткаченкэ Андрей и цIэр зезыхьэ СурэтыщI гъуазджэхэмкIэ музейм щагъэлъагъуэ Битокъу Владислав и лэжьыгъэхэр щызэхуэхьэса «Ракурс» выставкэр. Абы хагъэхьащ зэман зэмылIэужьыгъуэхэм щыIа унэхэм я теплъэр, иджырей псэупIэхэр къызэщIиубыдэу.
Музейм и унафэщI Ремхен Еленэ и псалъэм къыхигъэщащ Владислав и лэжьыгъэхэм блэкIам, сабиигъуэм узэрыхашэжыр.
- Лэжьыгъэхэр щIэщыгъуэщ. Пэж дыдэу пасэрей унэ цIыкIухэм, абы щыпсэуахэм я гъащIэм дыхашэж, - жиIащ КъБР-м щэнхабзэмкIэ и министрым и къуэдзэ Карчаевэ Iэминэ. - Зэман сиIэу иджыри сыкъакIуэу унэ цIыкIухэм я дунейм зыщысплъыхьарэт! Си фIэщ мэхъу мыхэр зэ зылъэгъуахэм къытрагъэзэжу гупсэхуу лэжьыгъэхэм еплъыжыну гупыж зэращIынур! Художникыр зэкIэ ямыцIыхуми, ар цIэрыIуэ зэрыхъунум шэч хэлъкъым!
КъБР-м и Композиторхэм я зэгухьэныгъэм и унафэщI, УФ-м ГъуазджэхэмкIэ щIыхь зиIэ и лэжьакIуэ ХьэIупэ ДжэбрэIил и псалъэм къыхигъэщащ и сабиигъуэр сэман унэ цIыкIум зэрыщигъэкIуар, музейм къызэрыщIыхьэу, илъэгъуа лэжьыгъэм и щIалэгъуэу Тбилиси къыщыхутэжауэ къызэрыщи-гъэхъуар. Абы жиIащ апхуэдэ лэжьы- гъэ телъыджэхэр къохъулIэн папщIэ цIыхур цIыхуу къэнэжын зэрыхуейр.
КъБР-м и СурэтыщIхэм я зэгухьэныгъэм и унафэщI Къаныкъуэ Жаннэ къыхигъэщащ ягъэлъагъуэ унэхэр псори художникым езыр-езыру и гупсысэкIэ къызэригъэщIар икIи дэтхэнэ зы лэжьыгъэми гукъэкIыжхэм узэрыхашэр, сабиигъуэм, щIалэгъуэм щыIа унэхэр уигу къызэрагъэкIыжыр.
- Унэ щхьэхуэхэм е сурэтхэм къатесщIыкIа лэжьыгъэ сиIэкъым. Къалэн зыщысщIыжар щыIа псэупIэхэр къэзгъэлъэгъуэжынырщ, иджырей унэхэм я теплъэхэри къызэщIиубыдэу, - жиIащ Битокъу Владислав. - Иджырей архитектурэр сигу ирихьыркъым. Пасэм щыIа унэ цIыкIухэм илъэс пщIы бжыгъэкIэрэ щыпсэхэрт, «псэ» яIутти. Си лэжьыгъэхэр фигу зэрыдыхьам сринасыпыфIэщ!
Фигу къэдгъэкIыжынщи, Ткаченкэ Андрей и цIэр зезыхьэ СурэтыщI гъуазджэхэмкIэ музейм зэуэ иджыри выставкитI щолажьэ: музейм и фондым щахъумэ лэжьыгъэхэм щыщхэр щызэхуэхьэса «Образы времён» гъэлъэгъуэныгъэр, XX - XXI лIэщIыгъуэхэм я адыгэ сурэтыщIхэм я IэдакъэщIэкIхэр.
ТЕКIУЖЬ Заретэ.
Сурэтхэр Къарей Элинэ трихащ.