КъуэкIыпIэм щыпсэу къэралхэм я дунейм, я псэукIэм дихьэххэр, дауэ мыхъуми, и кIэм иплъащ серие 250-у зэхэт «Щхьэ псынщIэ» тырку телефильмым. Сыт хуэдизу ар кIыхьу зэпамышами, яIэщIэужагъуэу цIыхур абы емыплъауэ пхужыIэнукъым. Хэти, зэрыжытIащи, абыхэм я гъащIэр, я зэхэтыкIэр псэкIэ къещтэ, хэти фIэщIэщыгъуэщ куэду зэхэухуэна сюжетхэр, дерс къыхэхыпIэ зыхуэхъухэри щыIэщ. Сыт хуэдэ лъэныкъуэкIи къыщеплъи, ахэр псори зэуIуу къыщыбгъуэтынущ абыхэм.

ЗэрызэщхьэщыкI щымыIэу, апхуэдизрэ къытригъэзэж кадр къудейхэр зы хабзэ пыухыкIа гуэрым тету макIуэ, зэ еплъыгъуэкIэ нэм къыфIэмынар нэхъ иужьыIуэкIэ къызэщIикъуэжрэ, цIыхур игъэгупсысэу. Ар дэтхэнэ зы кинорежиссёрми и къалэн нэхъыщхьэу къелъытэ.

Iуэхугъуэ къызэрыгуэкIхэмкIэ къригъажьэу унагъуэ, лъэпкъ мыхьэнэм хуэкIуэж къэхъугъэхэм куэдым ущIагъэджыкI - ар тхыдэщ, щэнхабзэщ, унагъуэм щызекIуэ хабзэщ, нэмысщ. Къащти, дэ сыт а фильмхэм нэхъ къыщытлъыхъуэнкIэ хъунур? - ди лъэпкъэгъу куэдым а къэралыр псэупIэ зэрахуэхъуарщ. Едзыгъуэ къэс ди зэлъытыныгъэ гуэрхэр къыдэмыушын пхуэщIынукъым, адыгэу Тыркум исым я бжыгъэр къэплъытэмэ. ЛIэщIыгъуэ бжыгъэм Iуэхур щыхуэкIуэм деж зым и щапхъэр адрейм, мащIэу нэхъ мыхъуми, къимыщтэнкIэ Iэмал иIэкъым.

КъыщIэддзэнщ нэхъыжьым унагъуэм щигъуэтын хуей пщIэмрэ увыпIэмкIэ - ди хабзэхэм куэдыр тохуэ. Апхуэдэщ ныбжьыщIэхэм яхэлъ щэнри, я зэхущытыкIэ къабзэхэри. Iейрэ фIырэ здэщымыIэ щыIэкъым. Губжьым, лъыщIэжым, щхьэ пщтырыгъэм, псынщIагъэм, фыгъуэм-псоми увыпIэ щагъуэтащ фильмым. КъуэкIыпIэмрэ къухьэпIэмрэ я лъэпкъ щэнхабзэхэр хуэм - хуэмурэ зэхэзэрыхьыжу къызыщыхъухэмкIэ мы фильмыр нэрылъагъу пэжым ухуэзышэ гъуазэщ. Лъэпкъ зэхуэмыдэхэм я хабзэм щыщ пычахуэ тIэкIухэр къыхыхьэ пэтми, абыхэм лъэныкъуэкIэ ирагъэкIуэтэкIыфыркъым ижь лъандэрэ къадекIуэкIыр.

Актерхэм я теплъэ, я нэгу къудейм дэ къыщыдолъыхъуэ ди лъэпкъым къытепщIыкIа яхэтынкIэ зэрыхъунур, ар гукIэ зыхэтщIэу. ИстамбылакIуэр ауэ къэгъэнауэ, Византие пащтыхьыгъуэм лъэпкъ дапщэ зришэлIа, хьэтхэри яхэту. Арагъэнщ Гюнюль и щхьэцыгъуэмрэ и нэ нащхъуэхэмрэ, Миран и губжьыкIэмрэ и псэ хьэлэлагъымрэ, Азат и зыпIэзэрытыгъэм, унагъуэм и тхьэмадэ Нэсухь и унафэ ткIийхэм дэ тпэгъунэгъу хуабагъэ къыщIыхэдгъуатэр.

Миранрэ Райянрэ я зэхущытыкIэр щапхъэ зытрахым хуэдэщ. Нэмыс лъагэм щIапIыкIа щIэблэм, ущIытешыныхьыжын щымыIэу, ехъумэ фIы псоми я къежьапIэ хабзэр, щэныр, нэмысыр. Сыт хуэдэ зэрыхьзэрий унагъуэм къимыхъуами, а Iуэхугъуищым ебакъуэ зэрымыхъунур хьэкъыу япхыкIауэ сыт хуэдэ гугъуехьми пэщIэтщ.

Кинематографие къабзэ зимыIарэ зимыIэ къэралыгъуэрэ щыIэкъым, ауэ жылагъуэ зэрыхьзэриймрэ зэхъуэкIыныгъэ инхэмрэ я зэманым къыхозэрыхь, емрэ щэныншагъэмрэ цIыхур къыхуезыджэхэр. Франджы, Америкэм и Штат Зэгуэтхэм я классикэ фильмхэм яхэткъэ щэн дахэр, гущIэгъур, гулъытэр лъабжьэ зыхуащIахэр?.. Сыт и уасэ совет лъэхъэнэм траха ди кинохэр? Нобэрей урысей фильмхэми яхэтщ фIым и щапхъэкIэ узэджэ хъуну куэд.

КъухьэпIэм и кино гъуазджэм бжьыпэр щаубыдащ «хуитыныгъэ» псалъэм и мыхьэнэр жэуаплыныгъэ зыми щимыхь Iуэху еплъыкIэщIэхэм хуэзышахэм. Абыхэм, куэд-мащIэми, я жьауэм щIэхуащ ди къэралым и киноиндустриери. Ямыужэгъуауэ пхужыIэнукъым, ехьэкIи, къехьэкIи щымыIэжу, махуэ къэс ди нэгу щIагъэкI кадрхэр: фIым и щапхъэу къащтэ цIыхубзхэми а фадэр ящIыгъущ, шеибжьэ къащIым хуэдэу. Псом нэхърэ нэхъ шынагъуэр ар апхуэдэу щытын хуейуэ фIэкIа ямыщIэжу, цIыхухэм я акъыл кIапцIэм ар «интеллигентнэу» зэрыщIагъэтIысхьэрщ. «Сыхуеймэ, цIыхубэр номин теплъэм хуэзгъэкIуэфынщ», - жиIэгъащ европей модельер цIэрыIуэхэм ящыщ зым…

 Фадэр здэщыIэм щызекIуэ Iейми къыпакIухьыркъым апхуэдэ «режиссёрхэм», уеблэмэ, къыбжаIэфынущ, абыхэм цIыхухэм дерс къыхахын щхьэкIэ ягъэлъагъуэу. Ахэра зымыщIэр, Iейр умыгъэлъэгъуэным нэхъыфI зэрыщымыIэр? Аращ лъэпкъхэм езыхэм я режиссёрыфIхэр къахэкI зэрыхъуам щIыщыгуфIыкIыпхъэр.

А псом иужькIэ, зэпыу имыIэу куэд еплъыфынущ зи киноиндустриер нэрылъагъуу махуэ къэс ефIакIуэ Тыркум и фильм къызэрыгуэкIхэми. НэгъуэщI мыхъуми, дощIэ нэр щIепхьэкIын абыхэм къызэрыхэмыхуэнур.

Мэлыжьыхьым и 15-м ди телевизореплъхэм къапоплъэ серие куэд хъу  зи чэзу тырку фильмыр.

ЛЪОСТЭН Музэ.