Тюнене Нальчикге Оренбургда дзюдодан бардырылгъан Евразияны кубогуна къатышхан жаш спортчула къайтхандыла. Темир жол вокзалгъа дзюдочулагъа тюберге жууукъ-ахлулары, тренерлери  да келген эдиле.

   Эришиуле 12-15 майда ётгендиле эм анга къатышханланы жыл санларына кёре, 2007-2013 жыллада туугъанланы араларында  бардырылгъандыла.  «Нальчик» спортклубну спортчуларын ары тренер Дзуев Залимгерий элтгенди.

  - Бу жол 21 адам баргъан эди. Аладан 14 майдал бла къайтхандыла. Ючеулен да «доммакъ» ючюн сермешлеге къатышхан эдиле. Къачанда мен дзюдочуларымдан бийик жетишимле сакълаучума да, ала да мени бир заманда энишге къаратмайдыла, - деп чертгенди ол.

   Поездден тюшгенлеге уа жарыкъ тепсеуле бла, байрам халда тюбегендиле. Жаш спортчуланы юйретген башха тренерле да къууанчларын жашырмай эдиле.

   Алай бла беш алтын майдалны финал сермешледе кеси ауурлукъларында Азаматланы Кантмир (28 кг), Асхад Хуранов (38 кг), Карина Хуранова (48 кг), Кантемир Хуранов (50 кг) эм Дилиана Шадова (63 кг) алгъандыла.

 «Кюмюшле» бла Биттирланы Алихан (38 кг), Сальдар Хачидогов (28 кг), Теммоланы Алан (43 кг) эм Хамид Дохов (46 кг) къайтхандыла.

  «Доммакъла» ючюн тюбешиуледе кючлюрекле болуп, аланы ычхындырмай саугъаланнганла уа  Беслан Гергов (31 кг), Георгий Натадзе (34 кг), Дамир Тлепшев (38 кг), Асланбек Бишенов (46 кг) эм Мусукланы Алим (73 кг)  болгъандыла.

   Финал сермешде хорлатып, экинчи жерге чыкъгъан Теммоланы Алан айтханнга кёре, дзюдогъа аны атасы келтиргенди. Келир эришиулеге ол бютюнда тынгылы хазырланып, «алтын» бла къайтыр муратлыды.

Таппасханланы Аминат.