Бу кюнледе Нальчикде табийгъат тийрелеге къарагъан «Горзеленхоз» предприятияда  баш къусхан  гюллени  гитче орунладан  теплицалагъа кёчюредиле. Ызы бла аланы шахарланы орамларында, майданларында, скверлеринде эм паркларында  орнатырыкъдыла.   

Шахарны айбатландырыргъа хайырланырыкъ  битимлени зыгытларын жарашдырып   Жангы жылны аллында окъуна башлайдыла.  Бюгюнлюкде «Горзеленхозну» теплицаларында гюллени  эки жыйырмадан аслам тюрлюсю ёсдюрюледи. Аланы хар бири да кеси  кезиуюнде керек боладыла.  Ол себепден бу жаны бла чырмау чыкъмаз ючюн уллу иш бардырылады.   

Предприятияны ишчилерини хайырындан хар жаз башында шахар кёзню къууандырырча болады. Сейирлик жарашдырылгъан тахтала эм бир бирге аламат келишген гюлле нальчикчилени эм къонакъланы да кёллерин кётюргенлей туруучудула. 

Бизни корр.