ТхылъыщIэ

ТекIуэныгъэ Иныр илъэс 78-рэ щрикъум ирихьэлIэу къыдагъэкIащ КъБР-м щIэныгъэхэмкIэ щIыхь зиIэ и лэжьакIуэ, КъБКъУ-м и социально-гуманитарнэ институтым урысыбзэмрэ бзэ щIэныгъэхэмкIэ и кафедрэм и унафэщI, филологие щIэныгъэхэмкIэ  доктор, профессор Башиевэ Светланэ и «Бессмертный полк Кабардино-Балкарского государственного университета» тхылъыр.

КъыдэкIыгъуэр щыщщ «Образ КБГУ в лицах» серием. Япэрейр - «90 лет КБГУ: люди и события» тхылъыр нэгъабэ бжьыхьэм къыдэкIащ. Абы ихуащ а еджапIэм илъэс зэхуэмыдэхэм щылэжьа IэщIагъэлI 425-м ятеухуахэр. ТхылъыщIэм Башиевэ Светланэ хигъэхьащ Хэку зауэшхуэм хэта КъБКъУ-м и студент, а еджапIэр къэзыуха  цIыху 530-м ятеухуахэр. КъыдэкIыгъуэм тхыгъэхэр щIэнгъуазэ щIыкIэм иту къыщыхьащ икIи абы сурэт куэд хагъэхьащ.

Светланэ лэжьыгъэшхуэ иригъэкIуэкIащ тхылъыр къыдэкIыгъуэм щыхуигъэхьэзырым. Абы зэхуихьэсыжами, щIипщытыкIами тхылъ куэдым я напэкIуэцIхэр къызэригъэдзэкIыжащ. Апхуэдэхэщ КъБКъУ-м и архивым щахъумэ анкетэхэр, автобиографиехэр, унафэхэр, нэгъуэщIхэри, «Память народа», «Подвиг народа», «Мемориал», еджапIэм и тхыдэм теухуа тхылъхэр, газет, журнал къыдэкIыгъуэхэм ихуа тхыгъэхэр, щIэныгъэ диссертацэхэр. Абыхэм ящыщщ профессор, физико-математикэ щIэныгъэхэмкIэ доктор, Хэку зауэшхуэм и ветеран Лесев Виталий и лэжьыгъэр. КъБКъУ-м и парткомым и унафэщIу щыткIэрэ, Лесевым егъэджакIуэхэмрэ студентхэмрэ я гъащIэм, ехъулIэныгъэхэм ятеухуа куэд зэхуихьэсат, Хэку зауэшхуэм зэрыщехъулIари къызэщIиубыдэу.

1975 гъэм, ТекIуэныгъэ Иныр илъэс 30 щрикъум, фронтым къимыкIыжа зауэлIи 114-м я цIэхэр тратхащ КъБКъУ-м и щIыхьэпIэ нэхъыщхьэм и бгъум деж щагъэува фэеплъым. Башиевэм  къыхигъэщащ совет цIыхубэм я текIуэныгъэм ехьэлIа тхыдэ фэеплъыр хъумэным мыхьэнэшхуэ зэриIэр, ар зауэлIхэм зэрахьа лIыгъэмрэ хахуагъэмрэ щIэблэр щIэпIыкIыным зэрыхуэщхьэпэнур. КъБКъУ-м и егъэджакIуэ, студент, ар къэзыухахэм ящыщ куэд хэкIуэдащ Сталинград, Кронштадт, Смоленск, Выборг, Новороссийск къалэхэр, Крымым, Белоруссием,  Латвием,  Эстонием хыхьэ щIыналъэхэр, Норвегиер, Польшэр, Югославиер, Германиер хуит къыщащIыжым.

Башиевэ Светланэ фIыщIэ яхуещI къыдэкIыгъуэм зи къару езыхьэлIа дэтхэнэми. Апхуэдэхэщ КъБКъУ-м кадр, къызэгъэпэщыныгъэ IуэхухэмкIэ и проректор ГъукIэпщокъуэ Мурат, еджапIэ нэхъыщхьэм  и архив IуэхущIапIэм и лэжьакIуэ ШэрыIужь Iэсият, универститетым и ветеранхэм я зэгухьэныгъэм и унафэщI Шурдым Хьэсэн сымэ.

Апхуэдэу, еджапIэм и тхылъ тедзапIэ, полиграфие къудамэхэм я унафэщI Хьэкъул Лидэрэ Мыд Валентинэрэ хэлъхьэныгъэфI хуащIащ зи бжыгъэр экземпляр 250-рэ хъу тхылъыр дунейм къытехьэным. Бжыгъэ Iэмалым тет къыдэкIыгъуэр «Вконтакте» социальнэ сайтымрэ Башиевэ Светланэ и «Мы - искры твои, КБГУ!» блогымрэ къыщывгъуэтынущ. Лэжьыгъэр къызэрыфщыхъуам теухуа фи гупсысэхэр евгъэхь хъунущ Светланэ и пощтым - 90-kbgu@mail.ru.

- КъыдэкIыгъуэхэм иджыри къыпыдощэ. «Образ КБГУ в лицах» серием дызэрелэжь илъэситIым къриубыдэу зэхуэтхьэсащ илъэси 100 зэрырикъур гъэ къакIуэ дгъэлъэпIэну ди мурад КъБКъУ-м и педагогикэ колледжым и тхыдэм теухуа тхыгъэ куэд, - жеIэ Башиевэ Светланэ. - А еджапIэм и лэжьакIуэхэмрэ ар къэзыухахэмрэ, ди республикэм, къэралым я социально-экономикэ щытыкIэм зегъэужьыным хэлъхьэныгъэфIхэр хуэзыщIахэм ятеухуа «Звёзды педагогического колледжа» тхылъыр согъэхьэзыр. Абыхэм ящыщщ педколледжым и фэеплъ пхъэбгъум зи сурэтхэр щыплъагъу, Совет Союзым и ЛIыхъужьитху: Байсултанов Алим, Иуан Хьэсэн, Иллазаров Исай, Къардэн Къубатий, Мэсей Аслъэнджэрий, Уммаев Мухьэжыр сымэ.

ТЕКIУЖЬ Заретэ.