Дунейм и щытыкIэм арэзы укъызэрищIа щымыIэми, Налшык и шыгъэжапIэм накъыгъэм и 9-м, зэрыхуагъэфэщауэ, цIыху куэд къекIуэлIат.
АтIэми, дяпэкIи апхуэдэу зэрыщытынумкIэ, уеблэмэ нэхъри нэхъыфIыж зэрыхъунумкIэ шэсыпIэ зэрихьэр зэхьэзэхуэм щыжаIащ «Урысейм и шыгъэжапIэхэр» АО-м и тхьэмадэ Зайцев Дмитрийрэ а IуэхущIапIэм Кавказ Ищхъэрэ, Ипщэ федеральнэ щIыналъэхэм щиIэ и къудамэм и унафэщI Сэкрэк Зауррэ. ТегъэщIапIэу ящIри Налшык ипподромым нэхъри зригъэужьыным ди къэралым иужьрей илъэсхэм гулъытэ хэIэтыкIа зэрыхуищIырщ.
Къэдгъэлъагъуэмэ, накъыгъэм и 9-м мы «тэхъуанэм» къеблэгъа нэхъыжьыфIхэм «сэлэт кашэ» Iуагъэхуащ, шыгъажэр щызэпыухэм деж, республикэм и артист цIэрыIуэхэм зауэм теухуа уэрэдхэр щагъэзэщIащ. ЦIыкIухэри тезыгъэун Iэмал Iэджи къыхуагъуэтащ: хуагъэува каруселымкIэ кърашэкIащ, «Налшык» хьэлвэ заводым къахуиутIыпща псы IэфI зэмылIэужьыгъуэхэмкIэ зрагъэтIыжащ, къыдыр гъэщIэрэщIам чэзукIэрэ ягъэшэсащ.
Iуэхум щIидзэн ипэ къызэхуэсахэм я пащхьэ къыщыпсэлъащ КъБР-м и Правительствэм и УнафэщIым и япэ къуэдзэ Говоров Сергейрэ «Урысейм и шыгъэжапIэхэр» АО-м и тхьэмадэ Зайцев Дмитрийрэ. МахуэшхуэмкIэ ехъуэхъуу шыгъэжапIэм къекIуэлIахэм зыщыхуагъазэм, абыхэм къыхагъэщащ дунейм и щытыкIэм емылъытауэ, апхуэдиз цIыху мы щIыпIэм къызэрекIуэлIам зэрыщыгуфIыкIари, езы шыгъажэр екIурэ-ещхьу зэрекIуэкIынум шэч къызэрытрамыхьэри.
Шыгъажэр едзыгъуипщIу зэщхьэщыхат. 8-м - лъы къабзэ зыщIэт шыгъажэшхэр щызэпеуащ, 2-м - хьэрыпышхэр къыщагъэжащ. Саугъэтхэр зэхэтлъхьэжмэ, псори зэхэту сом 1 мелуанрэ мин 400-рэ хъурт. Абыхэм ящыщу пщIэ нэхъ зиIэу ягъэувар «Пробнэ» зыфIаща зэпеуэхэм щытекIуахэм иратахэрт.
Махуэм иращIэкIа зэхьэзэхуэр илъэситI зи ныбжь хьэрыпышхэр метр 1000-м къыщызэдагъажэкIэрэ щIадзащ. Ахэр къэзыгъэпхъэрахэр щIэныкъуэкъуащ СССР-м и кхъухьыдзэм и адмирал Головко Арсений и фэеплъ саугъэтыр къэхьыным.
Телъыджэр аращи, Iуэхум хэзыщIыкIхэм, шэч къытрамыхьэжу, зы жьэу зэдыжаIат мы зэхуэзэгъуэм бжьыпэр къыщызыхьын хуеяр Мордухович Эдуард и хакIуэш Эдинбург зыфIащар арауэ зэрыщытыр. АрщхьэкIэ, къызэрекIуэкIари къызэрыщIидзари нэгъуэщIущ. «Терский» шы заводым къыщагъэхъуа Нимбус Терска шы гъуабжэм ищхьэкIэ зи гугъу тщIахэр зыпэплъар къызэпиудащ: япэ категорие зиIэ шууей Щоджэн Iэдэм къигъэжа шым зытехьа гъуэгуанэр псом япэ къызэринэкIащ.
КIэлъыкIуэу, «Налшык и саугъэт» зыфIащам щIэбэнынымкIэ метр 1200-рэ зи кIыхьагъ гъуэгуанэм щытекIуащ «Волгоградский» шы заводым щапIа Мит Миф шыгъажэшыр. Ар зыгъэсар мастер-тренер Хьэткъуэ Щамилщ, къэзыгъэжар Хьэткъуэ Резуанщ.
«Пробнэ» зыфIаща зэпеуэхэм ящыщ зыт Урысейм и ЛIыхъужьхэм я цIэкIэ саугъэтым щыщIэбэнар. Мыбдежым щехъулIар «Терский» шы заводым и Верная Терск шырщ. Ар къэзыгъэжар шууей Щоджэн Iэдэмщ.
Накъыгъэм и 9-м иращIэкIа шыгъажэм и курыхт ТекIуэныгъэм и махуэм и цIэкIэ ирагъэкIуэкIа зэпеуэр. Илъэсищ зи ныбжь хакIуихыр метр 1600-м къыщызэдагъэжати, япэ яфIищар Краснодар крайм щыIэ «711» шы заводым къыщагъэхъуа Чэмп Дэнсерщ. Шыр жыжьэ кърашами, и уанэгу исар ди лъэпкъэгъу, «Кабардинский» шы заводым илъэс куэдкIэ щылэжьа Албэрды Анзорщ. Мы щIалэр, къыхуагъэфэща саугъэтыр къыщратыжым, шыгъэжапIэм къекIуэлIахэм я мызакъуэу, ди къэралым и цIыху псоми махуэшхуэмкIэ ехъуэхъуащ (къызэрыщIэкIымкIэ, езыри дунейм къыщытехьар накъыгъэм и 9-рщ).
115-нэ шу дивизэм и цIэкIэ ирагъэкIуэкIа зэпеуэм километри 2 зи кIыхьагъ гъуэгуанэм щызэIущIащ зи ныбжь хэкIуэта хакIуи 9-р. Абыхэм ящыщу бжьыпэр зыубыдар «Налшык» хьэлвэ заводым и шэщым къыщIаша Терек Стар хакIуэрщ.
Къармэ Хъызыр и фэеплъу къызэрагъэпэща зэхьэзэхуэм метр 1800-м къыщызэдагъэжащ илъэсищ зи ныбжь шыхэр. Абыхэм ящыщу текIуар «Малкинский» шы заводым щаIыгъ Ландромат шы гъуабжэрщ. Ар зыгъэсари къэзыгъэжари япэ категорие зиIэ шууей Шыкъ Астемырщ.
Абхъаз Республикэм и ЛIыхъужь, генерал-лейтенант Сосналы СулътIан и фэеплъу ягъэува саугъэтыр къэхьыным метр 1800-р къызэзынэкIахэм ящыщу бжьыпэр иубыдащ Шулер зыфIаща шым. Ар зейр Алий Рашидщ, зыгъэсар Алокъуэ Аслъэнджэрийщ, къэзыгъэжар Пэнжокъуэ Рустамщ. Шы гъэхъуным куэд щIауэ яужь ит абхъаз щIалэ Цишбэ Нодар и IэрыкI саугъэтыр абыхэм яIэщIэзылъхьар Абхъаз Республикэм и Президентым и чэнджэщэгъу Ашбэ Ахърэрэ а щIыналъэм ди республикэм щыщу щызэуахэм я зэгухьэныгъэм и тхьэмадэ Яхэгуауэ Сергейрэщ.
Налшык ипподромым накъыгъэм и 27-м щекIуэкIыну къыкIэлъыкIуэ шыгъажэм, хабзэ зэрыхъуауэ, «Спринтерские» саугъэтхэр щагъэджэгунущ.
ЛУЦ СулътIан.