Электрокъарум хэщIыныгъэшхуэ щIигъуэт щхьэусыгъуэхэм ящыщщ элетросетхэр жьы зэрыхъур, дунейм и щытыкIэм елъытауэ абыхэм ныкъусаныгъэ зэрагъуэтыр, апхуэдэу щхьэхуещэхэм электрокъарур зэрадыгъур. А псори къалъытэ «Россети - Кавказ Ищхъэрэ» компанием къудамэм - «Къэббалъкъ-энерго» зэгухьэныгъэм и IэщIагъэлIхэм. Иужьрей зэманым абыхэм пщIэншэу кIуэд электрокъарур мазэ къэс процент 0,3 - 0,5-кIэ ягъэмэщIэн яхузэфIокI.
Апхуэдэ ехъулIэныгъэм и лъабжьэщ ремонт лэжьыгъэхэр егупсысауэ зэрырагъэкIуэкIыр, жьы хъуа кIапсэхэр, апхуэдэу зи лъэщагъыр хуэмыкIуэж трансформаторхэр и зэманым зэрахъуэжыр. 2019 гъэм псори зэхэту ремонт лэжьыгъэхэм сом мелуани 199,4-рэ хухахащ икIи а лэжьыгъэхэм я нэхъыбапIэр компанием езым и къарукIэ иригъэкIуэкIынущ.
ЦIыху щхьэхуещэхэм ядыгъу электрокъарур нэхъ мащIэ щIыным къа-руушхуэ ирахьэлIэ ШэмпIар Эдуард зи пашэ IэщIагъэлI гупми. Абыхэм дызэрыт илъэсым и япэ кварталым Май районым къыщыщIагъэщащ сом мелуанрэ минищэрэ и уасэ электрокъарур къэзыдыгъуну яужь ита промышленнэ IуэхущIапIэ мыин. Апхуэдэ хабзэншагъэхэр къыщагъуэт языныкъуэ уней лъапсэхэми.
А щIыкIэм тету къыдагъахуэр тра- гъэкIуадэ хъунут электросетхэр къэ- гъэщIэрэщIэжыным, «Къэббалъкъэнерго» зэгухьэныгъэм и лэжьакIуэхэм я улахуэр къэIэтыным, электрокъарур зэрытрагуашэр егъэфIэкIуэным, нэгъуэщIхэми. Ауэ а Iуэхум зэкIэ унафэ пыухыкIа тращIыхьакъым.
Зэгухьэныгъэм 2019 гъэм щIидзауэ егъэзащIэ электрокъарум и учётыр зэрырагъэкIуэкI щIыкIэр егъэфIэкIуэным хуэунэтIа программэ. Абы хиубыдэу электрокъарур къызэрабж Iэмэпсымэхэр зэрахъуэкIыу щIа-дзащ. Иджырей апхуэдэ Iэмэпсымэхэр компьютерым нэхъ ещхьщ. Киловатт бжыгъэхэр къызэрыридзэм къыдэкIуэу, абыхэм дэтхэнэ абонентри щахъумэ сетым кърикIуэ электрокъарум зэрызихъуэжым къихьынкIэ хъуну мыхъумыщIагъэхэм: хуей щыхъум деж электрокъарур занщIэу ягъэувыIэ.
IэмэпсымэщIэхэр 2022 гъэм нэсыху щагъэувынущ Дзэлыкъуэ, Бахъсэн районхэм, Бахъсэн къалэм. 2030 гъэм ирихьэлIэу электрокъарур къызэрабж иджырей Iэмэпсымэхэр республикэм и жылагъуэ псоми щызэрахъуэкIынущ.
