Урысейм и махуэр Къэбэрдей-­Балъкъэр Республикэм мэкъуауэ­гъуэм и 12-м Iэтауэ щагъэлъэпIащ. Республикэ унафэщIхэмрэ щэн­хабзэ, жылагъуэ IуэхущIапIэхэм я лIыкIуэхэмрэ, налшыкдэсхэмрэ хьэщIэхэмрэ, ныбжьыщIэхэр щы­зэхуэсат Къэбэрдейр Уры-сейм зэрыгухьэрэ илъэс 400 зэрыри­къуам и щIыхькIэ щыIэ утыкум.

ЦIыхухэм я лъэпкъ фащэхэр щатIэгъат, гукъыдэжрэ дэрэжэ­гъуэрэ зэраIэр зыхыуагъащIэу. Оркестрым игъэIу макъамэхэм едаIуэу ахэр гупу екIуэлIащ Къэрал кино­концерт гъэлъэгъуапIэм. Урысейм и нып метри 8 зи кIыхьагъыр зыIыгъа волонтёрхэмрэ кадетхэмрэ псом япэ итащ. Абдеж къыщызэ­ра­гъэ­пэщат республикэм и сурэ­тыщI­хэм, IэпщIэлъапщIэхэм, сабий школ­хэм я гъэсэнхэм я Iэдакъэ-щIэкI гъэлъэгъуэныгъэхэр.
КъБР-м и Жылагъуэ палатэм и ­жэрдэмкIэ къызэрагъэпэща пшы­хьыр къы­зэIуихащ а IуэхущIапIэм и унафэщI Берд Хьэзрэтали
- Урысейр зыми хуэмыдэ къэ- ралщ, - жиIащ абы. - И пщIэр иIыгъыу ар зэман нэхъ гугъу дыдэхэми къып­хыкIащ. Ар и фIыгъэщ цIыхубэм я ­зэкъуэтыныгъэм. Нобэ ди къалэнщ ди Хэкур нэхъри едгъэфIэкIуэну, ­дуней псом фIы и лъэныкъуэкIэ къыхэщу тщIыну. Къэралыр лъэщмэ, абы и цIыхухэм зыри къытегушхуэ­фынукъым, пщIэ яIэнущ. Урысейр зи инагъым увыпIэ лъагэ щиIыгъщ ди Къэбэрдей-Балъ­къэр щIыналъэм, лъэпкъи  100-м щIигъу зэрысым. Республикэм и ехъулIэныгъэхэр къэралым къигъэлъэгъуащ   ордениплIкIэ. Зы­щыдгъэгъупщэ хъунукъым, ди ­лъахэр сыт щыгъуи Кавказ Ищхъэрэм и налкъутналмэсу зэ­ры­щытар, дя­пэкIи апхуэдэнущ. Дызэкъуэтыху къыт­текIуэн щыIэкъым! Мы махуэш­хуэр абы и щыхьэтщ. Мамырыгъэрэ узыншагъэрэ фиIэну сыныво­хъуэхъу.
Бердыр къэпсэлъа нэужь, къызэ­хуэсахэм я гукъыдэжыр къаIэту;зы­къа­гъэлъэгъуащ республикэм и уэ­рэджыIакIуэхэмрэ сабий къэфа­кIуэ гупхэмрэ.
Сурэтхэр Къарей Элинэ трихащ.