Алгъаракъда Москвада каратени зёндекай будо тюрлюсюнден «Аскерчи» деген ат бла турнир бардырылгъанды. Анга акъылбалыкъ болмагъан спортчула къатышхандыла. Къабарты-Малкъардан кеслерини кючлерин бир ненча клубну келечилери сынагъандыла. 
«Элбрус» спорт клубну келечилери бу эришиуден саугъаланы асламын жыйып келгендиле. Тренерле Жантудууланы Азаматда бла Жаникаланы Асланда жарау этген спортчула ара шахардан 6 «алтын», 4 «кюмюш» эм 2 «доммакъ» бла къайтхандыла. Жыл санларына эм ауурлукъларына кёре Кючмезланы Айдар, Отарланы Алан, Бачиланы Къурман, Шахмырзаланы Кантемир бла Темирлан ахыр сермешледе биринчиле болгъандыла. Кюмюш майдалла Гочаланы Кязимге, Мендикеев Имраннга, Отарланы Алиханнга эм Гочаланы Темирланнга жетгендиле. Ючюнчю жерге Гыллыланы Азрет бла Балаланы Илияс чыкъгъандыла. 
Алчы спортчуларыбыз а декабрь айда Италияда каратени бу тюрлюсюнден бардырыллыкъ дунияны чемпионатына бла биринчилигине къатышырыкъдыла. 

Таппасханланы Аминат.