«Дин бла намыс» республикалы конкурсну ахыр бёлюмюню эсеплери чыгъарылгъандыла. Анга аталгъан жумушла «Маяк» санаторийде бардырылгъандыла. Бу иш КъМР-ни Миллетлени ишлери эм жамауат проектле жаны бла министерствону башламчылыгъы тюрлю-тюрлю динлени келечилерини араларында мамырлыкъны, шуёхлукъну ниетлерин жаяр мурат бла къуралгъанын белгилерчады.
Программаны эм аны чеклеринде къуралгъан жаш тёлю лагерьни башламчысы Екатерина Суркова бизге ангылатханыча, биринчи кезиуде конкурс битеу муниципалитетледе бардырылгъанды. Тамата классланы окъуучулары юч бёлюмде эришгендиле – суратла ишлеп, эссе жазып эм назму айтып. Ала жаш тёлюде дин байламлыкъланы, бир бирге хурметликни юслеринден хапарларгъа керек эдиле.
Муниципал бёлюмде хорлагъан 40 жаш бла къыз а «Маяк» санаторийде ючкюнлюк лагерьде тургъандыла эмда кеслерини араларында айырмалыланы сайлагъандыла.
– Юч кюнню ичинде жаш адамла бла ушакъла бардыргъанбыз, тюрлю-тюрлю амалланы хайырланып, аланы дин жаны бла билимлерин ёсдюргенбиз. Дагъыда барыбыз да бирге республиканы ара межгитинде, килисада бла синагогада болгъанбыз. Жаш адамла алай бла динлени мурдорундан хапар алгъандыла, къыралыбызда кёп миллетлени келечилери жашагъанларын билгендиле. Дагъыда аланы уялмай кёп адамланы аллында сёлеширге да юйретгенбиз, – дегенди бизге Екатерина Суркова.
Ол кюн а жаш адамла проектлерин къоруулагъандыла, динлени араларында келишиулюкге аталгъан суратланы ишлеп, эсселени жазып, назмула айтып айырмалыла сайланнгандыла. Саугъалауну аллында уа жаш адамланы миллетлени ишлери эм жамауат проектле жаны бла министрни орунбасары Гергъокъланы Жамбулат сёлешгенди. Ол жаш адамланы быллай жумушлагъа терк-терк къатышыргъа чакъыргъанды, аланы кезиуюнде кеслерине иги нёгерле табарыкъларын белгилегенди.
Хорлагъанла дипломла, китапла эм эсде къаллыкъ саугъала бла белгиленнгендиле.
