Адыгэм ди мащIэкъым къыщалъхуа жылэм, зыщыщ лъэпкъым, и адэжь щIыналъэм я пщIэр зыIэт нэхъыжьыфIхэр. Лъэпкъ хабзэмрэ нэмысымрэ зыдалъагъу, абыкIэ щIэблэм щапхъэ яхуэхъу а цIыхухэращ «Ар адыгэщ!» псалъэр Iэтауэ жезыгъэIэр. Апхуэдэхэм ящыщщ Шытхьэлэ къуажэм щыпсэу Джатокъуэ Анурбий Исуф и къуэр.
Зи сабиигъуэри балигъ хъугъуэри Хэку зауэшхуэм и илъэс хьэлъэхэм, абыхэм къакIэлъыкIуа лъэхъэнэ гугъухэм хиубыда Анурбий иджыри цIыкIуу зыхищIащ «гъащIэр матэщIэдзауэ» зэрыщымытыр. ЩыщIэныгъэхэмрэ лъэпощхьэпохэмрэ, адрей совет унагъуэ мелуанхэм хуэдэу, къапхыкIыфащ Джатокъуэхи, я пщIэрэ я нэмысрэ яIыгъыжу, жылэм дэс адрей лъэпкъхэм щапхъэ яхуэхъуу. Гу къабзэ-псэ къабзэу къэтэджа Анурбий балигъ хъуа нэужь, и лэжьыгъэ Iыхьэ ирихьэкIащ, фIыщIэрэ щытхъурэ пылъу. И ныбжьыр зыгъэпсэхугъуэ пIалъэм нэсами, Iуэхуншэ зэи хъуакъым. Ар цIыхум яхэту, жылэм дэс щIэблэр дин къабзэм хуиущийуэ илъэс куэдкIэ лэжьащ Шытхьэлэ къуажэм я ефэндыуэ. Ноби ар куэдым я чэнджэщэгъущ, унэтIакIуэщ.
Къыхэдгъэщынщи, Анурбий куэд лъандэрэ и ныбжьэгъуфIщ «Адыгэ псалъэ» газетыр. Абы и къыдэкIыгъуэхэм хуэпIащIэу зыIэригъэхьэу, фIэхьэлэмэтуи щIиджыкIыу апхуэдэщ ар.
ЗэрытщIэщи, дэтхэнэ унагъуэми илъ насыпыр елъытащ нэхъыжьым абы щигъэув хабзэм, нэмысым. Джатокъуэхэ я унагъуэр абыкIи щапхъэ зытепх хъунухэм ящыщщ. Анурбийрэ абы и щхьэгъусэ ХьэIишэтрэ яухуа унагъуэ дахэм зэгурыIуэмрэ зэдэIуэжымрэ и лъабжьэщ, зэхэщIыкIымрэ лъагъуныгъэмрэ и тегъэщIапIэщ. Зэщхьэгъусэхэм зэдапIащ икIи гъащIэм и гъуэгу пэжым щытрагъэуващ хъыджэбзищ: ФатIимэ, Мадинэ, Залинэ сымэ. Я адэ-анэм абыхэм гъэсэныгъэ екIу халъхьэфащ, щIэныгъэ, зэрыпсэун IэщIагъэ ирагъэгъуэтащ. Нобэ ахэри, абыхэм къащIэхъуа щIэблэри добжьыфIэ дадэ Iумахуэу зи махуэшхуэр зыхуагъэлъапIэм.
«Анурбий зэрыфIыр и унагъуэм исхэм я закъуэкъым. Ар къытхуэгуапэщ икIи къытхуэнабдзэгубдзаплъэщ и къуэш бынхэми, къытщIэхъуэ щIэблэми. Аращ ар псоми ди дадэу къыщIэтлъытэри», - жаIэ Джатокъуэхэ Залинэ, Марьянэ, Къантемыр сыми, адрей зэкъуэш бынхэми.
Джатокъуэхэ ди нэхъыжьыфIхэм ящыщ Анурбий мы махуэхэм егъэлъапIэ и илъэс 80 юбилейр. ЦIыхугъэ нэсыр, пэжыгъэр, лъэпкъ хабзэ дахэр дапщэщи къызыдэгъуэгурыкIуэ нэхъыжьыфIым, ущиякIуэ нэсым, чэнджэщэгъу Iущым ди гуапэу дохъуэхъу и узыншагъэрэ и гуащIэрэ мыкIуэщIу, быным, абыхэм я щIэблэм я насыпым и псэр игъэнэхурэ и гум ехуэбылIэу, и щхьэгъусэмрэ езымрэ зэкъуэмыхуу куэдрэ зэдэпсэуну. Дэрэжэгъуэрэ гукъыдэжрэ я куэду, гуауэр япэIэщIэу, я дунейр дахэу, я пщIэр лъагэу, я унагъуэ жьэгур мыужьыхыу къащIэхъуэ щIэблэм куэдрэ Тхьэм ящхьэщигъэт Анурбии ХьэIишэти.
Дыпхуэарэзыщ, ди нэхъыжьыфI. Пхуэфэщэн Алыхьым дищI!
Джатокъуэхэ къабгъэдэкIыу.
Шытхьэлэ къуажэ.