Чынтты къырал къуллукъчу, хунерли къураучу, адепли инсан

Белгили политика эмда къырал къуллукъчу  Нахушев Заурби Ахмедовичге 80 жыл толгъанды. Ол Къабарты-Малкъаргъа Россей къыралны къыйын 
кезиулеринде биринде оноу этген къауумданды.  Ол кезиуде, бизге арталлыда къужур кёрюннген, не къуллугъунг, не даражанг, не къыйынынг эсге 
алынмагъан болумлада, республиканы бирлигин сакълар, аны федерал арада сейирлерин къоруулар ючюн къаты кюреширге керек болгъанды. 
Мында уа, энди эркин болдукъ деп, хар нени ояргъа, малтаргъа, бузаргъа хазыр болгъан демократ кибикледен къорууланыргъа тюшгенди.

Ол къазауатда хорлар ючюн жангы Къабарты-Малкъарны айныу жолун бегитирик законла керек эдиле. Аланы жарашдырып башлауну къураргъа уа алай тынч болмагъанды. Заурби Ахмедович а, республиканы Парламентини Председателича, законла чыгъарыу ишни бийик даражагъа кётюралгъанды. Ма  бюгюнлюкде биз жюрютген эмда жашауда бардыргъан законла аны заманында жарашдырылып къабыл кёрюлгендиле. Ала битеуроссей эмда халкъла аралы мардалагъа толусунлай келишедиле. 
Республикада рынок жорукъла  тохташа тургъан ол къыйын жыллада, адеп-къылыкъны алгъыннгы мардалары бла хазналары энди жарамагъанларын сезиу кючлене башланнганда, хар затны жангыдан къураргъа тюшгенди. Ма ол заманда Заурби Ахмедовични билими, сынауу да бир заманда да болмагъанча изленнгендиле. Ол республиканы Президенти Валерий Мухамедович Коков бек ышаннган, аны билимине бла сынаууна базыннган адамладан бири болгъанды.
Биз да, аны шуёхлары бла ишчи нёгерлери, анга, арый-тала билмеген профессионалгъача, жууаплы эмда хунерли оноучугъача, таза ниетли эмда адежли адамгъача, уллу хурмет этгенбиз. Къырал жумушла бла тышына чыгъаргъа тюшгенде, Валерий Мухамедович республиканы келечилерине башчылыкъ этиуню Заурби Нахушевге буюргъаны да бошдан тюйюл эди. Бирде аллай жолоучулукъла тынч ётмегендиле, аны къой, къоркъуулу окъуна эдиле. Аны  Масхадны заманында Чеченнге неда уруш бара тургъан Абхазиягъа кёп кере магъаналы жумуш бла баргъанларын юлгюге келтирсек да тамамды. 
Заурби Нахушев уллу урунуу эмда жашау сынауу болгъан адамды. Ол 1943 жылда 1 мартда Жанхотия элде уллу юйюрде туугъанды. Къабарты-Малкъар къырал университетни бошап, алим-агроном усталыкъны алгъанды. Ростовда  Бийик партия школда билимин ёсдюргенди.
Гитчеликден окъуна ишлерге юйреннген, не заманда да огъурлулукъ этерге итиннген инсанча, Заурби Ахмедович адамлагъа дайым керек болгъанды. Урунуу жолун ол 1960 жылда Тырныауузну аз вольтлу аппаратура чыгъаргъан заводунда башлагъанды, аскерде къуллукъ этгенди, Тырныауузну вольфрам-молибден комбинатыны «Молибден» руднигинде уруннганды.
Артда кёп заманны эл мюлкде ишлегенди. Аны Черкес Бакшеевич Мовсисян ахшы специалистнича «Нальчик» совхозгъа чакъыргъанды. Ма анда Заурби Ахмедовични ишни къурай билген хунери бютюн бек ачыкъланнганды. Ол агроном, бригадир да болгъанды, ишчи комитетни таматасына, совхозну парткомуну секретарына да айырылгъанды.
1982-1987 жыллада уа КПСС-ни Нальчик шахарда Ленин райкомуну эл мюлк бёлюмюне башчылыкъ этгенди, Къабарты-Малкъар АССР-ни Агропромышленность жаны бла къырал комитетини парткомуну секретары болуп тургъанды. КПСС-ни Бахсан райкомуну биринчи секретары, ызы бла уа Бахсан муниципал районну администрациясыны башчысы болуп ишлегенде уа, аны сынауу, билими да бютюн бек жарагъандыла.
Токъсанынчы жыллада уа ол республиканы жамауат-политика ишлерине  бютюн тири къатышады. 1992 жылда Валерий Мухамедович Коков республиканы президентине айырылгъанда, Заурби Ахмедович Къабарты-Малкъар Республиканы Правительствосуну Председателини орунбасарыны къуллугъуна салынады. 1993 жылда уа аны Къабарты-Малкъар Республиканы Парламентини Республика Советини Председателине айырадыла. 
Бу къуллукъда ол он жыл чакълы ишлегенди. Ма ол кезиуде башланнганды республиканы Парламентини жангы болумлада къуралыуу. Заурби Ахмедовични башчылыгъында салыннганды законла чыгъарыугъа тынгылы мурдор дерге боллукъду. Парламентни Председатели болуп тургъанлай, ол дагъыда Россей Федерацияны Федерал Жыйылыууну Федерация Советинде да республиканы атындан келечилик этгенди.
Ол кезиуде Заурби Нахушев Халкъла аралы Черкес Ассоциацияны президентине да сайланады. Намысы жюрюген, адепли эмда билимли адамча, битеу дуниягъа жайылгъан адыгланы араларында байламлыкъла къурар  муратда кёп адыг жамауат организацияланы бла къымылдауланы бирикдиргенди. Бизни тыш къыраллада ата журтлуларыбыз бюгюнлюкде да Заурби Ахмедовични уллу ыразылыкъ бла сагъынадыла.
2002 жылда аны «Единая Россия» политика партияны регион бёлюмюню башчысына айырадыла. 2003 жылда ол Россей Федерацияны Федерал Жыйылыууну Къырал Думасыны тёртюнчю чакъырылыууну депутаты болады, «Единая Россияны» Къырал Думада фракциясыны къауумуна киреди, Федерацияны ишлери  эмда регион политика жаны бла комитетини председателини орунбасарына сайланады. Бу къуллукъда Заурби Ахмедович федерал даражалы къырал эмда политика къуллукъчу болгъанын кёргюзтгенди эмда Россейни бла Къабарты-Малкъар Республиканы кёп жумушларына жарагъанды.
Республиканы айныууна, жашнаууна, анда келишиулюк болуруна да уллу къыйын салгъаны ючюн Заурби Нахушев Сыйлылыкъны ордени, «Къабарты-Малкъар Республиканы аллында къыйыны ючюн» орден бла саугъаланнганды. Аны Абхазия Республиканы аскер орденине да тийишли кёргендиле.
Бюгюнлюкде Заурби Ахмедович солуудады, алай тынчайып турмайды: Россей Федерацияны бла Къабарты-Малкъар Республиканы Жамауат палаталарыны къауумларына киреди. Аны энтта да кенгешге тутадыла, хурметлейдиле, шуёхлугъу бла ёхтемленедиле. Биз да аны бла ёхтемленебиз. 80-жыллыгъы бла алгъышлай, аламат юйюрюне насып бла ырахатлыкъ тежейбиз!

Зумакъулланы Борис,
КъМР-де Адамны эркинликлери жаны бла 
уполномоченный,
Хазратали Бердов,
КъМР-ни Жамауат палатасыны таматасы ,
Хаути Сохроков,
Халкъла аралы черкес ассоциацияны башчысы.

Поделиться:

ЧИТАТЬ ТАКЖЕ:

29.05.2024 - 12:35

КЪЫРАЛ ЧЕКНИ КЪОРУУЛАУЧУЛАРЫ БЛА ЁТМЕКНИ ЖАРТЫ ЭТИП ЖАШАГЪАНДЫЛА

Чекчини кюнюне

29.05.2024 - 12:35

ЖЕТИШИМЛИ ПРЕДПРИНИМАТЕЛЬ БОЛУРГЪА СЮЙГЕНЛЕГЕ

Озгъан ыйыкъда Нальчикде «Мени бизнесим – онгланы заманы 2024» деген форум ётгенди.

29.05.2024 - 10:00

ТЫРНЫАУУЗЧУЛА БАРЫСЫН ДА ХОРЛАГЪАНДЫЛА

Алгъаракъда Нарткъала шахарны «Эльбрус» деген картодромунда Шимал Кавказны Кубогу деген эришиу ётгенди. Ол энчи аскер операцияда ёлген аскерчилени хурметлерине жораланнган эди.

29.05.2024 - 09:59

ЖАН АУРУТА БИЛИУ АДАМЛЫКЪНЫ ШАРТЫДЫ

Адамны къартлыкъдан къачар, къутулур онгу болмайды. Алай, аны насыплы ётдюрюр ючюн амалла къураргъа уа болады.

29.05.2024 - 09:25

ГИТЧЕ БИЗНЕС – КЪЫРАЛНЫ ЭКОНОМИКАСЫНЫ ТУТУРУГЪУ

Бизни къыралда адамла предпринимательство бла кюрешип башлагъанлы кёп ёмюр озгъанлыкъгъа, аны бла байламлы закон - «Энчи иш бла кюрешиуню юсюнден» - биринчи кере жаланда 1986 жылда чыкъгъанды.