Сабийлени тюрлю-тюрлю болумлада къоркъуусуз жашау бардырыргъа юйретиу, от тюшюуге къоркъуусузлукъну жорукъларын билдириу – сейирлери болгъан битеу министертволаны борчуду. 

Аны толтурууну чегинде МЧС-ни жер-жерли бёлюмюню от тюшюуге къажау-къутхарыу службасыны келечилери Нальчикде бёлюмню къутхарыучулары бла бирге шахарны 29-чу гимназиясында юйретиуле бардыргъандыла. Ала окъуучулагъа мектепде, юйде, орамда да кеслерине, башхалагъа да къоркъуу чыгъармазча къалай жюрютюрге керек болгъанларын ангылатхандыла. Ачыгъанлагъа къалай болушургъа тийишлисин кёргюзтгендиле, экстренный службаланы телефонларын эсгертгендиле.

Гитчелеге отну ёчюлтген приборланы хайырланыуну эм тютюнден ууланмазча не этерге кереклисини юсюнден дерс берилгенди, жана тургъан мекямдан терк къалай чыгъаргъа боллугъу кёргюзтюлгенди. Ведомствону академиясыны тёртюнчю курсуну студентлени Атабийланы Алан бла Гадийланы Ислам а жаш адамлагъа усталыкъларын къалай сайлагъанларыны, окъугъан жерлерини юсюнден айтхандыла. От ёчюлтюучюле да къаллай къутхарыу операциялагъа къатышханларыны юсюнден хапарлагъандыла, сабийлени страховка снаряжение бла хайырланыргъа юйретгендиле, страховка тюйюмчекле къалай этилгенлерин, къутхарыу техниканы бла инструментлени кёргюзтгендиле. Башланнган классланы окъуучуларына сурат кёрмюч къуралгъанды, ала уа къонакъларына сахна оюнчыкъла хазырлагъандыла. 

Юйрениулени теория кесегинден сора жарау халда эвакуация бардырылгъанды. Устазла сабийлени мекямдан терк эм халатсыз чыгъаргъандыла. Тышында гитчеле от ёчюлтюучюлени машиналарына къарагъандыла. Абадан классланы окъуучулары уа къутхарыучуланы кийимлерин кийип, эстафетагъа къатышып эришгендиле.

Кульчаланы Зульфия.