Суу ырысхыланы Битеудуния кюнюне жоралап, Нальчикде онунчу номерли китапханасында ачыкъ дерс бардыргъандыла. Анга Республикалы сабий эколого-биологиялы араны гитче классларыны окъуучулары эмда устазла къатышхандыла, деп билдиргендиле РусГидро компанияны Къабарты-Малкъарда бёлюмюнден.

Алай бла сабийле жер башында таза сууну аслам кесеги къайда болгъанын эшитгендиле, аны аяргъа кереклисин да ангылагъандыла. Дагъыда гидроэлектростанцияланы ишлетирча черекле керек болгъанларын да билгендиле. Быллай станцияла экология жаны бла эм таза электрокюч чыгъаргъанларыны юсюнден да айтылгъанды алагъа.

Дерсни эм сейирли кесеги уа викторина эмда лабораторияда сынам ишле эдиле. Устаз сабийлеге жер башында суу не халда болуучусун эмда аны бла байламлы сейир затла кёргюзтгенди. Ахырында уа «Кёксюлдюм тасма» деген флешмоб бардырылгъанды. Ол да суу байлыкъланы сакълаугъа эс бурурча жарашдырылгъанды.

Быллай сейирлик дерсге къатышхан сабийлени барына да саугъагъа «ЭлектроПЛАН» китапла юлешгендиле. РусГидро аны «Сабий китапны юйю» деген фонд бла бирге чыгъаргъанды. Ол а бизни къыралда гидро, жылыу, кюн эмда геотермальный электростанцияла ишлеген регионлада жолоучулукъду дерге боллукъду. Бу китапны сатыугъа чыгъармагъандыла, саулай тиражын а китапханалагъа, сабий юйлеге, интернатлагъа, билим бериу учреждениялагъа юлешгендиле.

Улбашланы Мурат хазырлагъанды.