Жаз башы от тюшерге къоркъуу кезиуледен бирине саналады. Белгилисича, ёртенлени асламысы адамны хатасындан башланадыла. Бютюнда бу кюнледе инсанланы асламысы бахчаларында бла жер юлюшлеринде къауданны, чырпыны эмда башха аберилени кюйдюрюрге ашыгъадыла. Ол бир тюрлю сылтау бла жайылып кетсе, тийреге къаллай хата саллыкълары уа кишини  къулагъына кирмейди.   

  Россейни МЧС-ини КъМР-де Баш управлениясындан  билдиргенлерича, быйыл республикада от тюшерге эм  къоркъуулу жерлеге Элбрус, Тегенекли эмТерс-Къол, Нальчик шахар округда уа Хасания, Кенже эм Акъ-Суу элле саналадыла. Аны бла бирге ёртенден сакъланырча къаты контроль этилирге тийишли  сабий лагерьлени, терек бахчалыкъ биригиулени (дачаланы) тизмеси да хазыр этилгенди.  

Бюгюнлюкде ведомствону  бёлюмлери от тюшер эм  черекле кётюрюлюр кезиуге не жаны бла хазырдыла. Ишчи къауумла муниципалитетлени барында да болум бла  шагъырейленнгендиле. Аны чеклеринде къыйын болумланы кезиуюнде жамауатха билдирирча системаны ишине,  инженер, энчи техниканы болумуна, материал бла жалчытыугъа эм башха затлагъа да эс бургъандыла.  

Ведомствода айтханларыча, черекле кётюрюлюр заманнга да ала алгъадан  хазырдыла. Ол санда  быйыл Май районда  бла Нартанны къатында Деменюк бла Нальчик сууланы жагъаларын кючлерча  эм ызларын   тазаларча уллу иш бардырыллыкъды. 

Бизни корр.