БЖЫГЪЭР ЗИ ЛЪАБЖЬЭ ДЕРСХЭР

«Бжыгъэр зи лъабжьэ дерсхэр» зи фIэщыгъэ урысейпсо егъэджэныгъэ жэрдэмым ипкъ иткIэ, Нарткъалэ дэт лицей №1-м 2023 гъэм гъатхэпэм и 7-м дерс зэIуха щекIуэкIащ, Ар хьэрычэтыщIэ IэнатIэм и зыужьыныгъэм хуэгъэпса программэ зэмылIэужьыгъуэхэр зэрызэхэт Iыхьэхэр къэхутэным икIи джыным теухуат.

Дерс зэIухам хэтащ КъБР-м бжыгъэрылъанэ зыужьыныгъэмкIэ и министр Ащхъуэт Ислъамрэ КъБР-м егъэджэныгъэмрэ щIэныгъэмкIэ и министр Езауэ Анзоррэ. Дерс зэIухам пэIудзауэ хэтащ «Бжыгъэм и дерсхэр» жэрдэмыр зи нэIэ щIэт Князев Дмитрийрэ «Бжыгъэрылъанэ экономикэ» жылагъуэ зэгухьэныгъэм и унафэщI Плуготаренкэ Сергейрэ. Апхуэдэу къыхэгъэщын хуейщ зэрыкъэралу щекIуэкI дерс зэIухахэр УФ-м ЕгъэджэныгъэмкIэ и министерствэм бжыгъэрылъанэ зыужьыныгъэмкIэ и къулыкъущIапIэм и унафэщI Горобец Андрейрэ УФ-м Бжыгъэрылъанэ зыужьыныгъэмкIэ и министерствэм Программэхэмрэ пэхуэщIэхэмрэ гъэзэщIэнымкIэ и къулыкъущIапIэм и унафэщI Трубниковэ Татьянэрэ я нэIэ зэрыщIэтыр.

«Илъэс зыбжанэ хъуауэ ди къэралым пIалъэ-пIалъэкIэрэ щрагъэкIуэкI «Бжыгъэр зи лъабжьэ дерсхэм» ягъуэт гулъытэм хэхъуэу, къыщIэупщIэхэм я бжыгъэр нэхъыбэ хъууэрэ йокIуэкI. ГурыIуэгъуэщ еджакIуэхэми, абыхэм я адэ-анэхэми гъащIэм щекIуэкI зэхъуэкIыныгъэхэр зэрызыхащIэр, абы къыхэкIыу щIэныгъэ гуэдзэ зрагъэгъуэту къыхаха IэщIагъэмкIэ я есэныгъэхэр ягъэкууну зэрыхэтыр. Дунейм экономикэ зэхущытыкIэхэм теухуауэщ зэрызиужьыр, арыххэуи, абы епха IэщIагъэ зэмылIэужьыгъуэ куэди гъащIэм къыхохьэ. ХьэрычэтыщIэ IэнатIэм и зыужьыкIэм жылагъуэ-экономикэ псэукIэ зэпэщыр зэрепхар къэплъытэмэ, абы пыщIа IT-IэнатIэхэми зэрызаужьынур гурыIуэгъуэщ. НыбжьыщIэхэр зыщIэупщIэ, гъэщIэгъуэн ящыхъу IуэхугъуэхэмкIэ щIэгъэкъуэн дыхъуныр, пасэу дунэтIыныр мыхьэнэ зиIэ къалэну къыдолъытэ, а гуращэр абыхэм яIэщIэмыужьыхэу дяпэкIи дылэжьэну ди гугъэщ», – жиIащ Горобец Андрей.

Дерсым къигъэув Iуэхугъуэхэр курыт еджапIэхэр зэрылажьэ программэм токI. Абы къыхэкIыу методикэ чэнджэщхэр зэхагъэуващ, сабийхэр щылажьэ пэшхэм я къызэгъэпэщыкIэр техникэ и лъэныкъуэкIэ зэщхьэщыкIынкIэ зэрыхъунур къэзылъытэ сценариехэри зэхалъхьащ.

«Къэралым и жылагъуэ-экономикэ зыужьыкIэм уеплъмэ, нэрылъагъущ абы бжыгъэр тегъэщIапIэ зыщI зэхъуэкIыныгъэхэр къызэрыхихыр, абы хуэкIуэ гъуэгур хишмэ, игъуэу къызэрилъытэр. ХэзыщIыкIхэм зэрыжаIэмкIэ, мис а щытыкIэм къегъэув хъыбарегъащ1э технологием и мыхьэнэр ин хъуныр, абыкIэ щIэныгъэ зиIэ IэщIагъэрылажьэхэм я пщIэм хэхъуэныр. IT-IэнатIэхэм, зэрыгурыIуэгъуэщи, заужь. ИпэкIэ зэхэдмыха, зэи дызримыхьэлIа IуэхугъуэщIэхэр махуэ къэс жыхуаIэм ещхьу гъащIэм къыхохъухь. ГъэщIэгъуэнращи, нэхъыбэр зэпхари хъыбарегъащIэ технологиехэращ. Абы къыхэкIыу къызэрымыкIуэу мыхьэнэшхуэ яIэщ курыт щIэныгъэ щрагъэгъуэт еджапIэхэм щIэс сабийхэм бжыгъэмрэ информациемрэ ехьэлIауэ ират дерсхэм. ЩIэныгъэр еджэныгъэм къыхокI, ауэ ар тхылъым епха къудей мыхъуу, нэрылъагъу Iэмалхэми ятещIыхьауэ щытын хуейщи, ари къыдолъытэ, ди методикэ нэхъыщхьэри аращ, жыпIэми щыуагъэ хъунукъым. Къыхэтлъхьэ методикэ Iэмалхэм япэ классхэм щIэс цIыкIухэр IT-IэщIагъэхэм я дунейм занщIэу хишэфынущ, абы щекIуэкI Iуэхугъуэхэм щигъэгъуэзэфынущ. ЕджакIуэхэм компьютер программэхэр зэрызэхагъэувэм хэлъ щэхухэр къащIэну, абы халъхьэ пкъыгъуэхэм я мыхьэнэр зэхагъэкIыну, информацием ехьэлIа технологиехэр зэрылажьэ щIыкIэхэм зыщагъэгъуэзэну Iэмал яIэнущ. Си щхьэкIэ шэч къытесхьэркъым, ди дерс зэIухахэм къыхыхьэ ныбжьыщIэхэм къэкIуэну зэманхэм IT-IэщIагъэлI нэсхэр къазэрыхэкIынум», - жеIэ Трубниковэ Татьянэ.

«Урысейм щопсэу технологиещIэхэр зыфIэгъэщIэгъуэн, ахэр зэрызэрагъакIуэ Iэмэпсымэхэм я зэпкърылъыкIэмрэ лэжьэкIэмрэ зэзыгъащIэ, зи щыпэ IT-пэхуэщIэхэр зэхэзыгъэувэ ныбжьыщIэ куэд. Абы, шэч хэмылъу, щыхьэт тохъуэ къэралым IT-щIэныгъэхэмкIэ иригъэкIуэкI зэпеуэхэмрэ зэхьэзэхуэхэмрэ къыхыхьэ щIалэгъуалэм я бжыгъэр. Зым и дежкIи щэхукъым интеллект IэрыщIыр ди гъащIэм лъэ быдэкIэ къызэрыхэувар. Iэмалрэ зэфIэкIрэ зиIэ нэхъыжьыIуэхэм къыттохуэ а щытыкIэр зыIэщIэдмыгъэкIыу фIы и лъэныкъуэкIэ дунэтIыну, щIалэгъуалэр зытет гъуэгур зыхащIэу икIи гушхуауэ ар хедгъэшыныр. Мы махуэхэм едгъэкIуэкIыну дерс зэIухахэр хьэрычэтыщIэ IэнатIэм зиужьын папщIэ, дызыхуэкIуэ дунейм и IT-фащэр зыщитIэгъэн, фейдэ къигъэхъэржэным къыщымыувыIэу, дяпэкIи хэхъуэр зэблэзымыгъэу жыжьаплъэ программэхэр хузэхалъхьэфу щIэблэр егъэсэн хуейщ. Сыт хуэдэ IэнатIэми упхыплъыфу, абы зезыгъэужьыну Iэмалхэмрэ зэпэпшэчэфу щытыпхъэщ. Арыххэуи, интеллект IэрыщIыр, технологиещIэхэм я Iэмалхэр, программэ зэхэгъэувэкIэм ехьэлIа есэныгъэхэр мыхьэнэшхуэ зиIэ щIэныгъэ лIэужьыгъуэу къоув. Ди дерсхэм зи зэхэщIыкIыр лъагэ, зэчий зыбгъэдэлъ ныбжьыщIэ куэд я къарум иригъэплъу загъэунэхужыфыну къытфIощI, IT-IэнатIэм зезыгъэужьынхэри къахэкIыну къытщохъу. Ди IэщIагъэлIхэм ягъэхьэзыращ хьэрычэтыщIэ IэнатIэхэм куэдрэ узыщрихьэлIэ, джэгукIэ жыпхъэм и бизнес-анализ зэмылIэужьыгъуэхэр. Ар къахутэфмэ, и зэхэлъыкIэр ялъагъумэ, нэхъ гугъуу зэхэт программэхэми зрапщытыфынущ, - жиIащ Плуготаренкэ Сергей.

«Бжыгъэм и дерсхэр» жэрдэмыр 2018 гъэ лъандэрэ Урысейм щрагъэкIуэкI. Абы и ублэгъуэм ирихьэлIэу къэралым и IT гупхэм дерсхэм къыхалъхьэну лэжьыгъэхэр зэхагъэувэ, ахэр курыт щIэныгъэ щрат IуэхущIапIэхэр зэрылажьэ программэхэм епхауэ зэхалъхьэ, щхьэ закъуэ лэжьыгъэуи гуп лэжьыгъэуи зэщхьэщах. Дерсхэр технологиемрэ программированиемкIэ IэнатIэхэм я дунейм ухэзышэ Iэмалщ, къэкIуэну зэманхэм я экономикэм хуэгъэза лэжьыгъэщ.

ШУРДЫМ Динэ.

Поделиться:

ЧИТАТЬ ТАКЖЕ:

29.03.2024 - 08:57

ХЬЭЩIЭХЭМ ДЫКЪЫХАГЪАЩIЭ

Урысей Ипщэмрэ Кавказ Ищхъэрэмрэ регби 7-мкIэ пашэныгъэр къыщыхьыным теухуа зэхьэзэхуэ иджыблагъэ Налшык къалэм щекIуэкIащ.

29.03.2024 - 08:56

ГУАПЭУ ЯГУ КЪАГЪЭКIЫЖ

КъБР-м щIыхь зиIэ и журналист, Урысей Федерацэм, Къэбэрдей-Балъкъэрым щэнхабзэмкIэ щIыхь зиIэ я лэжьакIуэ, жылагъуэ лэжьакIуэ, «Советская молодёжь» газетым и редактор нэхъыщхьэу щыта Къардэн Мухьэм

29.03.2024 - 08:56

ХАДЭХЭКI ФIЭIУГЪЭХЭМКIЭ ДЫПАШЭЩ

Пхъэщхьэмыщхьэмрэ хадэхэкIымрэ къыхащIыкI консерву Кавказ Ищхъэрэм къыщыщIагъэкIым и процент 90-р Къэбэрдей-Балъкъэрым къылъос.

28.03.2024 - 09:03

АДЫГЭХЭМ Я КЪЕЖЬАПIЭР

   ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ.

28.03.2024 - 09:03

КАСПИЙСК ЩЫЗОХЬЭЗОХУЭ

Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм.